پۆلیتبورۆیا پارتیا دەمۆکراتا کوردستانێ – سووریا (پەدەکە-سە)، ب بۆنەیا 79ەمین سالڤەگەرا دامەزراندنا پارتیا دەمۆکراتا کوردستانێ (پەدەکێ)، پەیامەکا پیرۆزباھیێ ئاراستەیی سەرۆک مەسعوود بارزانی و پۆلیتبورۆیا پەدەکێ کر. د پەیامێ دە، پەدەکە-سێ تەکەزی ل سەر رۆلا دیرۆکی یا پەدەکێ د پاراستنا مافێن گەلێ کوردستانێ دە کر و تێکۆشینا وێ وەکە “چاڤکانیا شانازیا مە ھەموویان” بناڤ کر.
پۆلیتبورۆیا پەدەکە-سێ ئیرۆ 16ێ تەباخێ د پەیاما خوە دە، پیرۆزباھیێن خوەیێن گەرم پێشکێشی سەرۆک بارزانی و سەرکرداتیا پەدەکێ کر و ب رێزداری دامەزرینەرێن پەدەکێ، بارزانیێ نەمر و شەھید ئیدریس بارزانی، ببیر ئانین.
پەدەکە-سێ ئاماژە ب وێ یەکێ کر، ئەڤ بیرئانینا مەزن ھەڤدەمە لگەل رۆژبوونا سەرۆک بارزانی و ئەڤ یەک وێ دکە “قۆناغەکا دیرۆکی یا گەش د پێڤاژیا تێکۆشینا گەلێ مە دە.” ھەروھا ھات گۆتن کو پەدەکێ گەلەک قوربانی د رێیا پاراستنا مافێن گەلێ کوردستانێ و پێکانینا ھێڤی و داخوازێن وی دە دانە.
د پەیامێ دە رۆلا مەزن یا پەدەکێ یا د “بھێزکرنا پێڤاژیا دەمۆکراسیێ ل ئیراقا فەدەرال و پشتگریا دۆزا کوردی” دە ھات بلند نرخاندن. ھەروھا ھات تەکەزکرن کو پەدەکە ھەر دەم پابەندی نرخێن ئازادی و دادپەروەریێ بوویە.
د ھەمان دەمێ دە، پیرۆزباھی ل مالباتێن شەھیدان ھات کرن، کو وەکە چاڤکانیا شانازیێ ھاتن بناڤکرن.
د داویا پەیامێ دە، پۆلیتبورۆیا پەدەکە-سێ ھێڤیا سەرکەفتنا بەردەوام ژ بۆ پەدەکێ د پێڤاژیا وێ یا تێکۆشینێ و خزمەتکرنا گەلێ کوردستانێ دە خواست و گۆت: “رەحمەت ل شەھیدێن مەیێن پاکرەوان، و سەربلندی ژ بۆ تێکۆشینا وەیا بەردەوام بە.”
