سەکرەتەرێ ئەنجوومەنا بلند یا ئەولەکاریا نەتەوەیی یا ئیرانێ ئەشکەرە کر کو، وەلاتێ وی پشتی شەرێ 12 رۆژی یێ لگەل ئیسرایلێ ژ بۆ ژ نوو ڤە ئاڤاکرنا ھێزێن خوەیێن لەشکەری خەبتیە.
سەکرەتەرێ ئەنجوومەنا بلند یا ئەولەکاریا نەتەوەیی یا ئیرانێ عەلی لاریجانی د ھەڤپەیڤینەکا تەلەڤیزیۆنی دە گۆت کو، ھێزێن وان یێن لەشکەری نھا گەلەک د رەوشا ئامادەباشیێ دە نە. ھەروەسا گۆت، “پشتی کو ھندەک تشت د شەرێ 12 رۆژی یێ لگەل ئیسرایلێ دە ژ بۆ مە ئەشکەرە بوون، ئەم ل سەر خالێن لاواز یێن ئارتێشا خوە خەبتینە.”
لاریجانی د دەرحەقا دانووستاندنێن ل سەر پرۆژەیا ئەتۆمی دە ژی گۆت، “دانووستاندن تاکتیکێن دیپلۆماتیکن. دبە کو پر جاران ئەرک بە ژی، لێ یا ھەری گرینگ ئەوە کو ئەم ب ھەمی ھێزا خوە دانووستاندنان دکن.”
ناڤبری تەکەز ژی کر، “ئیران رازی نابە کو ل سەر بنگەھا ھێزێ دەمەک دیارکری ژ بۆ دانووستاندنان بێ دانان.” ئاماژە دا گڤاشتنێن وەلاتێن رۆژئاڤایێ کو، وەسا دکن کو دانووستاندن ب لەز بێن کرن.
سەکرەتەرێ ئەنجوومەنا بلند یا ئەولەکاریا نەتەوەیی یا ئیرانێ د دەرحەقا پرسگرێکێن لبنانێ دە ژی ئاماژە دا، “تشتێ کو ل لبنانێ دقەومە پرسەکا ناڤخوەیی یە، لێ ئەم ل کێلەکا گەلێ لبنانێ رادوەستن.” ھەروەسا گۆت، “ھەر بریارەک د دەستێ گەلێ لبنانێ ب خوە دەیە.”
شەرێ د ناڤبەرا ئیسرایل و ئیرانێ دە ل سەرێ سبەھا رۆژا ئینێ (13/6/2025) ھات دەستپێکرنا. ئیسرایلێ ب زێدەتری 200 بالافرێن شەری ب دەھان بنگەھێن لەشکەری ل تەھرانێ و گەلەک جھێن دن یێن ئیرانێ بۆمبەباران کرن، ھەروەسا ھەژمارەکا بەرپرسێن لەشکەری یێن پایەبلند و زانایێن ئەتۆمی کوشتن.
وەکی بەرسڤ ژ بۆ ئێریشێن ئیسرایلێ، ئیرانێ ژی ژ بۆ دەما 12 رۆژان تەلەڤیڤا پایتەختا ئیسرایلێ و چەند دەڤەرێن دن یێن وی وەلاتی ب مووشەکێن بالیستیک بۆمبەباران دکرن.
