سەرۆکێ پارلامەنتۆیا ترکیەیێ نومان کورتولموش راگھاند، پارلامەنتۆیا وان دێ ژ بۆ تەمامکرنا “پێڤاژۆیا براتیێ” بێیی کو ت گاڤەکێ پاشڤە باڤێژە دێ بەرپرسیاریا خوە بجھ بینە. کورتولموش ھەروھا ھشیاری دا کو “ھندەک کەس ل ھوندر و دەرڤە دخوازن رێ ل بەر ئاشتی و براتیێ بگرن” و تەکەز کر کو دڤێت رێ ل بەر وان بهێت گرتن.
نومان کورتولموش ئیرۆ 19ێ تەباخێ د دەستپێکا جڤینا چارەمین یا “کۆمیسیۆنا لھەڤکرنا نیشتیمانی، براتی و دەمۆکراسیێ” دە ئاخڤی و گۆت: “پارلامەنتۆیا ترکیەیێ دێ بێی کو گاڤەکێ پاشڤە باڤێژە، ئەرکێ خوە بجھ بینە، دا کو ئەڤ پێڤاژۆ د زووترین دەم دە ب داوی ببە و براتیا مە یا ھەرھەیی وەرە مسۆگەرکرن.”
سەرۆکێ پارلامەنتۆیێ بال کشاند سەر گرینگیا پشتگریا جڤاکی و وھا دۆماند: “یەک ژ ئەرکێن مە یێن ھەری گرینگ ئەوە کو ئەم رازیبوونا جڤاکی زێدە بکن و پشتراست بن کو پشتگریا بەشێن جودا یێن جڤاکا مە ژ بۆ ڤێ پێڤاژۆیا براتیێ زێدەتر دبە. ئەم د ناڤەندا پێڤاژۆیەکێ دە نە و دڤێت ئەم ب کەلەجانەکا مەزن بخەبتن.”
کورتولموش دا زانین، ئەو دێ د کۆمیسیۆنێ دە گوھ بدن ھەموو سازی و پێکھاتەیێن کو دکارن بەشداری پێڤاژۆیێ ببن و د داویێ دە ژ گەلێ ترکیەیێ رە نیشان بدن کا پێڤاژۆ چاوا دکارە ب ئاوایەکی سەرکەفتی ب داوی ببە.
ھەروھا، کورتولموش ھشیاری دا و گۆت: “یەک ژ خالێن گرینگ یێن کو دڤێت ئەم د ڤێ پێڤاژۆیێ دە بالا خوە بدنێ ئەوە کو ل ھوندر و دەرڤە کەسێن کو دخوازن رێ ل بەر ئاشتی و براتیێ ل ترکیەیێ بگرن ھەنە. پێویستە ئەم رێ ل بەر وان بگرن.”
