چەتەیێن ب ناڤێ “جوانێن شۆرەشگەر” کو راستەراست فەرمانا ژ پەکەکێ وەردگرن، ل سەر رەڤاندنا زارۆکان ل رۆژئاڤایێ کوردستانێ و هەرێمێن د بن کۆنترۆلا هەسەدێ دە بەردەوامن و هەری داوی کەچەکە 14 سالی ل تاخا شێخ مەقسوودا حەلەبێ، ب مەرەما چەکدارکرنا وێ د ناڤا رەفێن رێخستنێ دە رەڤاند و بەر ب کامپێن چەکدارکرنا زارۆکان ڤە بر.
چاڤکانیێن هەرێمی ئەشکەرە کرن، رێخستنا چەتەیان “جوانێن شۆرەشگەر” کەچا 14 سالی یا ب ناڤێ “نوجان ئەحمەد خەلیل” د 16ێ تەباخا 2025 دە، ژ تاخا شێخ مەقسوودا سەر ب باژارێ حەلەبێ ڤە رەڤاندیە و بەر بەر ب یەک ژ کامپێن پەروەردەهیا لەشکەری یێن تایبەت ب زارۆکانڤە کو گرێدایی ڤێ رێخستنێ ب خوە نە ڤە، بریە.
ل گۆر ئاگاهیان، نوجان ژ گوندێ کورزلا یێ دەڤەرا شێراوا یا سەر ب گوندەوارێن عەفرینێ ڤە یە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
