کۆمیسیۆنا هەڤرێزیا نشتمانی، براتی و دەمۆکراسیێ، د چارچۆڤەیا هەولدانێن ژ بۆ پێڤاژۆیا ئاشتیێ دە، ئیرۆ د جڤینا خوە دە گوهداری نوونەرێن دایکێن ئاشتیێ، دایکێن شەمیێ و هن رێخستنێن مافێن مرۆڤان دکە.
کۆمیسیۆن ئیرۆ چارشەمێ، 20ێ تەباخا 2025ان، دێ د دو روونشتنان دە پێشوازیا مێڤانێن خوە بکە. د روونشتنا یەکەم دە، دێ نوونەرێن دایکێن شەمیێ و دایکێن ئاشتیێ بێن گوهدارکرن.
د روونشتنا دویەمین دە ژی دێ نوونەرێن وەقفا ئالیکاریا مرۆڤی، ماف و ئازادیان، کۆمەلەیا مافێن مرۆڤان، کۆمەلەیا پشتەڤانیا ژ بۆ مازلوومان (مازلومدەر) و وەقفا مافێن مرۆڤانا تاهر ئەلچی داخواز و نێرینێن خوە پێشکێش بکن.
ئەڤ جڤین د دەمەکێ دە تێ کو کۆمیسیۆنێ دوهـ ژی د جڤینا خوە یا چارەمین دە گوهـ دابوو ئالیێن دن. د وێ جڤینێ دە، مالباتێن لەشکەرێن ترک یێن کو د شەر دە هاتنە کوشتن و نوونەرێن “دایکێن دیاربەکرێ” بەشدار بووبوون و دەربارێ پێڤاژۆیا نوو یا ئاشتیێ دە داخوازێن خوە ئانیبوون زمان.
ناڤێن وەکی “دایکێن ئاشتیێ”، “دایکێن دیاربەکرێ” و “دایکێن شەمیێ” ل ترکیەیێ ژ بۆ وان دایکان تێن بکارئانین کو زارۆکێن خوە ژ بەر شەرێ د ناڤبەرا په‌كه‌كێ و ئارتێشا ترک دە وندا کرنە ئان ژی چارەنڤیسا وان نەدیارە.
