مرنا فه‌رماندارێ په‌كه‌كێ سه‌رحه‌د ڤارتۆ ئاشكه‌ره‌ بوو

ناسنامه‌یا فه‌رمانداره‌كی دن یێ هه‌په‌گێ ئاشكه‌ره‌ بوو كو ژ سالا 2021ێ ڤه‌ ل باكورێ كوردستانێ جانێ خوه‌ ژ ده‌ست دایه‌ و مرنا وی نه‌هاتبوو راگهاندن.

هه‌په‌گێ باسكێ له‌شكه‌ری یێ په‌كه‌كێ ئیرۆ رۆژا پێنجشه‌می 21 ته‌باخا 2025ێ ناسنامه‌یا فه‌رماندارێ خوه‌ یێ ب ناڤێ یووسف محه‌مه‌د ئاتیك و ب كۆدناڤێ سه‌رحه‌د ڤارتۆ ئاشكه‌ره‌ كر كو ل 26 ئادارا سالا 2021ێ ل ده‌ڤه‌را كاتۆ یا هه‌رێما بۆتانێ یا ل باكورێ كوردستانێ جانێ خوه‌ ژ ده‌ست دا بوو و رێخستنێ مرنا وی ئیلان نه‌كربوو.

هه‌په‌گێ ئاشكه‌ره‌ كرییه‌ كو ئه‌ڤ فه‌رماندارێ وێ ب نه‌خوه‌شیێ جانێ خوه‌ ژ ده‌ست داییه‌.

فه‌رماندارێ هه‌په‌گێ سه‌رحه‌د ڤارتۆ ل سالا 2003ێ ته‌ڤلی ره‌فێن په‌كه‌كێ ببوو.

رێخستنا په‌كه‌كێ ژ سالا 2021ێ ڤه‌ ب ده‌هان فه‌رماندار و كادرۆیێن خوه‌ یێن ل هێلا ژوور ب ئێریشێن ده‌وله‌تا ترك ژ ده‌ست دا نه‌، مرنا پرانییا وان ژی هه‌یا رۆژا مه‌ یا ئیرۆ ڤه‌شارتی مایه‌ و نه‌هاتیه‌ ئیلان كرن.