شەر و ئالۆزیێن سلێمانیێ ب داوی بوون، رەوش نها ئارام بوویە، د ده‌رئه‌نجاما ئالۆزیێ ده 15 کەس ژ هێزێن یه‌نه‌كێ بریندار بوونە و 3 کەسێن دن ژی هاتنە کوشتن.
د ئالۆزی و په‌ڤچوونێن ئیرۆ یێن ژ بۆی ده‌سته‌سه‌ركرنا لاهۆر شێخ جه‌نگی و برایێن وی ده كو ژ دوهـ ڤه ره‌وشا سلێمانیێ نه‌ئارام كربوو، ئیرۆ ئه‌ڤ په‌ڤچوون ب داوی بوون، ته‌ڤی لاهۆر هه‌ر یێك ژ پۆلات شێخ جه‌نگی و ئاسۆ شێخ جه‌نگی ژی هاتنه ده‌سته‌سه‌ر كرن.
هات راگهاندن كو رەوشا سلێمانیێ ئارام بوویە، تەنێ هێزێن یه‌نه‌كێ ل نێزیکی هۆتێلا لالەزارێ و دەردۆرا وێ مانە و ل وی جهی پشکنینان دکن.
ژ بەر وی شەری، ئاگر بەربوو وی جهی و بوو سەدەما وێ یەکێ کو ئاگر بەر ب جەبلخانەیێن لاهور شێخ جەنگی ڤە بچە. ژ بەر ڤێ یەکێ ژی، هەر ناڤبەر ناڤبەر دەنگێ تەقینان دهات بهیستن.
هێزێن یه‌نه‌كێ ناهێلن ت وەلاتیەک نێزیکی لالەزارێ ببە، بافل تالەبانی ژی چوویە جهێ وێ بوویەرێ، لێ نەهشت کو مەدیا دیمەنان ڤەبگوهزن.
هن ژ هێزێن لاهور شێخ جەنگی هاتنە گرتن و یێن دن ژی خوە تەسلیم کریە، هەروەسا سەرۆکێ وێ هێزێ رێبوار حەمد حەجی خالی ژی هاتیە گرتن.
ل گۆری ئاگاهیێن ده‌ستێ مه، د دەرهەقا لاهوور شێخ جەنگی و پۆلاتێ برایێ وی دە ژی گۆت کو، ئەو هەر دو ژ بۆ دەباشانێ هاتنە ڤەگوهاستن و پۆلات شێخ جەنگی بریندار بوویە و گولە ب لنگێ وی کەتیە.
ژ بەر وی شەری، 15 کەس ژ هێزێن ینکێ بریندار بوونە و 3 کەسێن دن ژی هاتنە کوشتن.
شەر و پەڤچوونێن د ناڤبەرا هێزێن یەکیتیا نشتمانی یا کوردستانێ یه‌نه‌كێ و هێزێن لاهور شێخ جەنگی دە شەڤێدی هاتنە دەستپێکرن و هەر زوو سەرۆکێ حکوومەتا هەرێما کوردستانێ مەسروور بارزانی راگهاند، «ئەڤ ئالۆزی و پەڤچوونێن ل سلێمانیێ دقەومن ئەولەهی و ئارامیا هەرێما کوردستانێ دکن ئارمانج».
سەرۆکوەزیرێ هەرێما کوردستانێ پێدڤی ژی دیت کو، هەمی ئالی خوە رابگرن و وان پەڤچوونان راوەستینن و جوانێن ڤی وەلاتی نەکن قوربانی. تەکەز ژی کر کو، دڤێ هەمی پرسگرێک و ناکۆکی ب رێیێن قانوونی بێن چارەسەرکرن.
