داییکێن ئاشتیێ یێن کو ل پارلەلەنتۆیا ترکیەیێ رێ ل بەر ئاخافتنا وان یا ب کوردی ھاتبوو گرتن ئاماژە کرن کو دڤێت ھەمو زەخت و زۆرێن پێشیا زمانێ کوردی ژ ھۆلێ رابن و ھەر وھا دڤێت د دەستوورا ترکیەیێ دە ناسنامە و زمانێ کوردی ژی وەرە ناسین.
داییکێن ئاشتیێ بۆ کۆمسیۆنا ھەڤگرتنا نەتەوەیی براتی و دەمۆکراسیێ ھاتبون ڤەخوەندن و دەما کو د کۆمیسیۆنێ دە خوەستبوون ب کوردی باخفن رێ ل بەر وان ھاتبوو گرتن. داییکێن ئاشتیێ دەربارێ ڤێ ھەلوەستێ دە ل دیاربەکرێ د نوونەرتیا کۆمەلەیا مافێن مرۆڤان یا دیاربەکرێ دە جڤینەک چاپەمەنیێ ل دار خستن و ل دژی ھەلوەستا سەر زمانێ کوردی بەرتەک نیشاندان. داییکێن ئاشتیێ ئاماژە کرن کو ئەو پشتگریا ھەموو ھەول و خەباتێن چارەسەریێ دکن لێ ھەلوەستێن وسایێن ل دژی زمانێ کوردی ژی قەبول ناکن.
داییکا ئاشتیێ، تورکیە بۆزکورت گۆت: “ئەم دبێژین دڤێت د دەستوورا کو نو وەرە چێکرن دە زمانێ کوردی و ناسنامەیا کورد ژی ھەبە، ئەم دخوازین کو بۆ زمانێ کوردی ستاتو بهێت دایین.”
داییکێن ئاشتیێ بانگ کرن کو دڤێت ل دژی رێنەدانا زمانێ کوردی ھەموو کورد د ھەموو قادێن ژیانێ دە ب زمانێ کوردی باخفن و ل زمانێ خوە خوەدی دەربکەڤن.
داییکا ئاشتیێ، مەریەمە توران ژی دبێژە: “ئەم بانگ ل ھەموو کوردان دکن کو ل زمانێ خوە خوەدی دەربکەڤن، د ھەموو قادێن ژیانێ دە ب زمانێ کوردی باخفن، بلا دێ و باڤ ب زارۆکێن خوە ب نەڤیێن خوە رە د مالێ ب زمانێ کوردی باخفن، ئەم دخوازین زمانێ کوردی ببە فەرمی.”
داییکێن ئاشتیێ بالێ دکێشن کو سەدەما پرسا کورد تنەحەسباندنا زمانێ کوردییە و سەدەما ئاڤاکرنا کۆمیسیۆنێ ژی چارەسەرکرنا پرسا کوردە و ژ بەر وێ ھەلوەستا کۆمیسیۆنێ خزمەتا چارەسەریێ ناکە، داییکێن ئاشتیێ دبێژن دڤێت کوردی ببە خوەدی ستاتو.
