رێڤەبەریا خوەسەر ب داخویانیەکێ راگھاند، ئەو ھلبژارتنێن پارلامەنتۆیێ یێن ل سووریەیێ ب ت ئاوایی ناس ناکن و ئەو وەک “بەردەوامیا سیاسەتا پاشگوھکرن و دوورخستنێ” دبینن. ھەروھا بانگ ل نەتەوەیێن یەکگرتی و جڤاکا ناڤدەولەتی کر کو ڤان ھلبژارتنان ناس نەکن.
رێڤەبەریا خوەسەر ئیرۆ 24ێ تەباخێ د داخویانیێ دە گۆت، پێڤاژۆیا سیاسی یا ھەیی ئارمانجێن شۆرەشا سووریێ پووچ دکە و پێنگاڤێن وەک کۆنفەرانسا دیالۆگێ، حکوومەتا دەمکی و ڤان ھلبژارتنان، ل دژی داخوازێن گەلێن ژ بۆ عەدالەت، دەمۆکراسی، وەکھەڤی و ئازادیێ نە.
“مافێ گەلێ سووریەیێ تێ دزین”
داخویانیێ بال کشاند سەر قوربانیێن گەلێ سووریەیێ و گۆت: “گەلێ سووریەیێ ژ بۆ بدەستخستنا مافێن وەلاتیبوونا راستەقین، د سەری دە مافێ کاندیدبوون و ھلبژارتنێن ئازاد و دادمەند، جانێ خوە فەدا کر. لێ ئەم دبینن کو دیرۆک خوە دوبارە دکە و جارەکە دن ئەڤ ماف ژ ھەموو سووریان تێ ستاندن. ئەڤ ھلبژارتن نە دەمۆکراتیکن و ب ت ئاوایی ئیرادەیا گەلێ سووریەیێ نیشان نادن.”
“نیڤا گەلێ سووریەیێ ھاتیە دوورخستن”
رێڤەبەریا خوەسەر دیار کر، لدارخستنا ڤان ھلبژارتنان د ڤێ دەمێ دە، تێ واتەیا دوورخستنا نێزیکی نیڤا گەلێ سووریەیێ ژ ڤێ پێڤاژۆیێ. ھەروھا گۆت: “ب ملیۆنان کەس ژ بەر کۆچبەریا نەچاری و پۆلیتیکایێن سیستەماتیک نکارن بەشدار ببن. ئەڤ دوورخستن ب سەرێ خوە دەلیلەک ئەشکەرەیە کو ئەڤ ھلبژارتن تەنێ پێنگاڤەکە رووکەشە و بەرسڤێ نادە پێویستیا چارەسەریەکە سیاسییا بەرفرەھ.”
رێڤەبەریا خوەسەر ئیدیعایا کو دبێژە ھەرێمێن باکور و رۆژھلاتێ سووریەیێ “نە ئەولە نە” ب توندی ھات رەدکرن و گۆت: “ئەڤ ھنجەتەکە دەرەوینە ژ بۆ ئینکارکرنا ئیرادەیا زێدەیی پێنج ملیۆن سووری. بەرەڤاژی ڤێ، ھەرێمێن مە ژ دەڤەرێن دنێن سووریەیێ ئەولەترن.”
بانگا ل جڤاکا ناڤدەولەتی
رێڤەبەریا خوەسەر گۆت ژی: “ئەم، وەک بەشەکی رەسەنێ سووریەیێ، ھەر بریارەکا کو ب ھشمەندیەکا یەکالی وەرە دایین رەد دکن. ئەم دێ ب ئەنجامێن ڤان ھلبژارتنان ڤە گرێدایی نەبن. ئەم بانگ ل نەتەوەیێن یەکگرتی و جڤاکا ناڤدەولەتی دکن کو ڤان ھلبژارتنان ناس نەکن، ژ بەر کو ئەو ل دژی بریارا 2254 یا ئەنجوومەنا ئەولەکاریێ نە.”
داخویانی ب تەکەزکرنا ل سەر چارەسەریەکا سیاسی یا گشتی ب داوی بوو، کو تێ دە ھەموو پێکھاتەیێن سووریەیێ ب ئاوایەکی ئازاد بەشدار ببن، دا کو بگھیژن “سووریەیەکە دەمۆکراتیک، پرالی و نەناڤەندی.”
