سیاسەتمەدارەکی کورد ل رۆژئاڤایێ کوردستانێ دبێژە کو سەرۆک مەسعوود بارزانی ژ دەستپێکا شۆرەشا سووریێ ڤە رۆلەکێ چالاک د پاراستنا دۆزا کوردی ل رۆژئاڤایێ کوردستانێ دە لیستیە و ئاماژە ب وێ ژی کریە، ئەو بەلگەنامەیا سیاسی کو د کۆنفرانسا نەتەوی یا کورد ل مەھا نیسانا بۆری دە ھات دەرخستن، نەناڤەندیا سیاسی وەک چارەسەریەک بۆ دۆزا کورد ل رۆژئاڤایێ کوردستانێ دەستنیشان کریە.
عەبدورەحمان ئابۆ، سیاسەتمەدارێ کورد ل رۆژئاڤایێ کوردستانێ، راگهاند: “چاڤدێریا سەرۆک بارزانی راستەراست د چارەسەرکرنا رەوشا د ناڤبەرا ئەنجومەنا نەتەوەیی یا کورد ل سووریێ (ئەنەکەسێ) و ئەنجومەنا رۆژئاڤایێ کوردستانێ یا سەر ب پارتیا یەکیتیا دەمۆکراتیک (پەیەدێ) د دەما ڤەخواندنا بۆ ھەولێر و رێکەفتنا ھەولێر 1 د 11ێ تیرمەھا 2012ێ دە، دوو رە چاڤدێریا پەیمانا دوھۆکێ د جۆتمەھا 2014ێ دە، کو مخابن، تەڤی گرینگیا خوە، تێک چوو.”
ھەروەھا: “چاڤدێریا سەرۆک بەردەوام بوو د دانووستاندنێن یەکیتیا نەتەوەیی یا کوردان 2020ێ د ناڤبەرا ئەنەکەسێ و پەیەدێ دە کو د ئەنجامێ دە د ناڤبەرا ھەر دو ئالیان دە د بن چاڤدێریا ناڤنەتەوەیی (بریتانیا، فرانسا و ئامەریکا)، دە بەلگەیەک سیاسی ھاتە ئیمزەکرن، بەری کو ژ بەر چەند سەدەمان راوەستە.”
ئابۆ گۆت، “پشتی ھلوەشینا رەژیما ئەسەد و ئاڤاکرنا حکوومەتەکا نوو ب سەرۆکاتیا ئەحمەد شەرع یا سالا پار، ئەڤ چاڤدێریا ناڤنەتەوەیی د بن چاڤدێریا سەرۆک مەسعوود بارزانی دە ژ نوو ڤە دەست پێ کر. بەلگەیەکا سیاسی یا بنگەھین یا تێکلداری تەڤگەرا کورد، کو نوونەرتیا گەلێ کورد ل رۆژئاڤایێ کوردستان-سووریێ دکە، دەرخست.”
ئەو سیاسەتمەدارێ کوردێ رۆژئاڤایێ کوردستانێ ئاماژە ب وێ ژی دکە، “ھەماھەنگیەکا ناڤنەتەوەیی یا ھەڤبەش ل سەر سووریێ و پرسگرێکا کورد ھەیە، و لھەڤکرنەک ژ بۆ دانووستاندنان د دو ئالیان دە ھەیە:
– د ناڤبەرا رێڤەبەریا ھەرێمی، ھێزێن سووریا دەمۆکراتیک، ئەنجوومەنا دەمۆکراتیکا سووریێ و حکوومەتا دەمکی یا سووریێ دە.
– د ناڤبەرا شاندەیا کورد و حکوومەتا دەمکی یا سووریێ دە دەربارێ چارەسەرکرنا پرسگرێکا کورد ل رۆژئاڤایێ کوردستانێ.”
عەبدورەحمان ئابۆ تەکەز کر کو ھەموو دانووستاندن دێ د بن چاڤدێریا ناڤنەتەوەیی و چاڤدێریا راستەراست دە ل ھەرێما کوردستانێ وەرن کرن. ئاماژە ب وێ ژی کر: “بەلگەیا سیاسی یا کو د مەھا نیسانێ دە ژ ئالیێ کۆنفەرانسا نەتەوەیی یا کورد ڤە ھاتیە دەرخستن، نەناڤەندیکرنا سیاسی ژ بۆ چارەسەرکرنا پرسگرێکا کورد ل رۆژئاڤایێ کوردستانێ دەستنیشان کر.”
ئابۆ د داویێ دە گۆت: “پێویستە کو حکوومەتا شامێ ل گۆری داخوازێن نەتەوەیی یێن ھەیی لگەل گەلێ کورد ل رۆژئاڤایێ کوردستانێ دانووستاندنێ بکە و قوربانیێن کو تەڤگەرا رزگاریا کورد د دەھ سالان دە دایە ل بەر چاڤان بگرە. د ناڤ وان دە، یەکیتیەک ئازادا دلخواز ژ بۆ گەلێ کورد، دایینا مافان ب خوەدیێن رەوا و چارەسەرکرنا پرسگرێکا کورد تەکانە رێیا مان و بەردەوامیا کۆمارا یەکبوویی یا سووریێیە.”
