كۆمارا ئیسلامییا ئیرانێ سێ گرتیێن سیاسی یێن كورد وه‌كه ئاماده‌كاری بۆ دارڤه‌كرنا وان، ژ زیندانا ئورمیێ شاندن زیندانا گشتی یا سوجانێ.
رێخستنا مافێ مرۆڤان یا کوردستانێ ب داخویانیەکێ راگهاند کو دوهـ سێ گرتیێن سیاسی یێن ب جەزایێ دارڤەکرنێ هاتنە مەحکوومکرن ب ناڤێ پەژمان سولتانی (30)، عەلی سۆران قاسمی (28) و رۆژگار بەگزادە (42) ب شێوازەکی نە یاسایی ژ گرتیگەها ئورمیەیێ ژ بۆ گرتیگەها گشتی یا سوجان هاتن شاندن.
د داخویانیێ دە هاتە دەستنیشانکرن کو سازیێن مافێن مرۆڤان ڤێ هەولدانێ وەک گەفەک ئەشکەرە ل دژی پاراستنا ژیانا وان ب ناڤ دکن.
رێخستنێ د هەمان داخویانیێ دە راگهاند کو ڤەگوهەستنا گرتیێن سیاسی ژ ئورمیەیێ بنپێکرنەک ئەشکەرە یا مافێن مرۆڤانە.
هاتە دیارکرن کو مالباتێن هەر سێ گرتیێن سیاسی ژ بۆ زەلالکرنا رەوشا زارۆکێن خوە سەردانا رایەدارێن دادوەری و ئەولەهیێ کرنە، لێ هەتا نها ت بەرسڤەک وەرنەگرتنە.
هه‌ر سێ گرتیێن سیاسی د دەما سەرهلدانا «ژن، ژیان، ئازادی» دە ژ ئالیێ هێزێن رەژیما ئیرانێ ڤە هاتبوون بنچاڤکرن. پرۆسەیا دارزاندنێ ژی ل دادگەها شۆرەشێ یا ئورمیەیێ ب ئاوایەکی نە دادپەروەرانە و بێیی ئامادەبوونا پارێزەرێن وان هاتە رێڤەبرن.
هەر سێ گرتی ب تۆمەتا «سەرهلدان، ئاڤاکرنا کۆمێن دژی حکوومەتێ، پەیوەندی و کۆمپلۆیێن ل دژی ئەولەهیا نەتەوی و پرۆپاگاندایا ل دژی دەولەتێ» ب جەزایێ دارڤەکرنێ هاتن مەحکوومکرن.
