ەرۆکوەزیرێ ھەرێما کوردستانێ مەسروور بارزانی ب بۆنەیا 37ەمین سالڤەگەرا تاوانێن ئەنفالا بادینانێ دە، جارەکە دن بانگ ل حکوومەتا فەدەرالا ئیراقێ کر کو ئەرکێ خوەیێ یاسایی و دەستووری د قەرەبووکرنا کەسووکارێن قوربانیێن جینۆسایدێ دە بجھ بینە.
سەرۆکوەزیر مەسروور بارزانی ئیرۆ 25ێ تەباخێ پەیامەک ل سەر تۆرا جڤاکی یا “X” بەلاڤ کر و تێ دە ب رێز و روومەت قوربانیێن وی تاوانا ھۆڤانەیا رەژیما بەرێ یا ئیراقێ ببیر ئانین.
د پەیاما خوە دە، سەرۆکوەزیر بارزانی داخوازا سەرەکەیا ھەرێما کوردستانێ دوبارە کر و گۆت: “پێویستە حکوومەتا فەدەرال ئەرکێ خوەیێ یاسایی و دەستووری د قەرەبووکرنا کەسووکارێن قوربانیان دە جیبجی بکە.”
ھەروھا، سەرۆکوەزیر سلاڤ ژ بۆ گیانێ پاکێ قوربانیێن جینۆسایدا ئەنفالێ و ھەموو شەھیدێن کوردستانێ شاند و تەکەزی ل سەر ڤان خالان کر:
– حکوومەتا ھەرێما کوردستانێ دێ د خزمەتکرنا کەسووکارێن شەھیدان و ئەنفالکریان دە بەردەوام بە.
– ھەولێن ژ بۆ ناسکرنا ڤان تاوانان ل سەر ئاستا ناڤدەولەتی وەک جینۆساید دێ بێن خورتکرن.
ئەنفالا بادینانێ
ئەنفالا بادینانێ، کو قۆناغا داوی یا پێنگاڤێن ئەنفالێ بوو، د ناڤبەرا 25ێ تەباخێ و 6ێ ئیلۆنا 1988ێ دە ژ ئالیێ رەژیما بەعسا رووخاندی ڤە ل سینۆرێ پارێزگەھا دوھۆکێ ھاتە پێکانین. ئەڤ پێنگاڤ کو وەک “ئەنفالا ھەشتەمین” تێ ناسکرن، دەڤەرێن زاخۆ، ئامێدی، شێخان، ئاکرێ و دوھۆکێ ل خوە گرت و تێ دە تاوانێن مەزن ل دژی خەلکێ سڤیل ھاتن کرن.
ل گۆری بەلگە و ئاماران، د ڤێ قۆناغێ دە نێزیکی 700 گوند ھاتن وێرانکرن و زێدەتری 14 ھەزار وەلاتیێن بێگونەھ بوون قوربانی. ب ھەزاران کەسێن دن ژی ھاتن گرتن و ھەتا ئیرۆ چارەنڤیسا وان نەدیارە.
ئەڤ تاوان بەشەک بوو ژ پێنگاڤەکا بەرفرەھتر کو بوو سەدەما شەھیدبوون و بێسەرووشوونبوونا زێدەتری 182 ھەزار کوردان ل سەرانسەرێ کوردستانێ. رەژیما بەعس د ڤان ئێریشان دە چەکێن کیمیەوی ب کار ئانی، گوند ب تەمامی وێران کرن، خەلکێ وان کۆمکوژ کرن یان ژی ئەو بەر ب چۆلستانێن باشوورێ ئیراقێ ڤە راگوھاستن و د گۆرێن کۆمی دە ب ساخی خستن بن ئاخێ.
