میرێ ئێزدیان، میر حازم تەحسین بەگ د کۆنفەرانسا ناڤدەولەتی یا ل سەر جینۆسایدا ئێزدیان دە ل ھەولێرێ، ب توندی نەرازیبوونا خوە ل ھەمبەری بریارا وەزارەتا کۆچ و کۆچبەران یا ئیراقێ نیشان دا و ئەو وەک “تەڤلیکرنا ب زۆرێ” ب ناڤ کر. میر حازم داخوازا ڤەگەرا ب روومەت یا ئێزدیان کر و گۆت، دڤێت شەرت و مەرجێن ژیانێ ل وارێ وان بێن دابینکرن.
ب ئامادەبوونا سەرۆکێ ھەرێما کوردستانێ نێچیرڤان بارزانی، ئیرۆ 25ێ تەباخا 2025ێ کۆنفەرانسا ئاکادەمیکا ناڤدەولەتی یا ل سەر جینۆسایدا ئێزدیان ل ھەولێرێ دەست پێ کر. د کۆنفەرانسێ دە میر حازم تەحسین بەگ گۆتارەک پێشکێش کر و رەوشا ب ئێش یا جڤاکا ئێزدی ئانی زمان.
میرێ ئێزدیان دیار کر کو کارەساتا سالا 2014ێ برینەکە وسا کوور ل پەی خوە ھشتیە کو ھەتا نھا خوین ژێ دحەرکە. ھەروھا گۆت: “ئەنجامێن وێ ئێریشێ ھەتا نھا ژی باندۆرا خوە ل سەر ئێزدیان ھشتیە. ب سەد ھەزاران ئێزدی ھەتا نھا د ناڤ کۆنان دە دژین و ب ھەزاران ژن و زارۆکێن مە ژی ھین بێسەرووشوونن.”
“داخوازا ڤەگەرەکا ب روومەت دکن”
میر حازم تەکەز کر، ھەرێمێن وان پێویستی ب ژ نوو ڤە ئاڤاکرنێ ھەیە دا کو ڤەگەرا ئێزدیان ڤەگەرەکا بروومەت بە. وی گرینگیا لدارخستنا کۆنفەرانسێن ب ڤی رەنگی دەستنیشان کر و گۆت: “ئەڤ کۆنفەرانسە گرینگن، دا کو ئەم دۆزا ئێزدیان د وژدانا مرۆڤاھیێ دە ب زندی بھێل.”
میر ھێڤی کر کو لێکۆلینێن کو د کۆنفەرانسێ دە تێن پێشکێشکرن ببن سەدەمەک ژ بۆ بجھانینا دادوەریێ و قەرەبووکرنا قوربانیان.
نەرازیبوونا توند ل ھەمبەری بریارا وەزارەتا کۆچێ یا ئیراقێ
میرێ ئێزدیان ب ئاوایەکی ئەشکەرە ھەلوەستا جڤاکا ئێزدی ل ھەمبەری بریارێن داوی یێن وەزارەتا کۆچ و کۆچبەران یا ئیراقێ راگھاند و گۆت: “ئەم گەلەکی ب بریارا وەزارەتا کۆچ و کۆچبەران یا ئیراقێ یا کو دخوازە ئێزدیان ب زۆرێ تەڤلی جڤاکێن مێڤاندار بکە، نیگەرانن. ئەڤ د دەمەکێ دەیە کو ھەتا نھا ت شەرت و مەرجەک ژ بۆ ڤەگەرا ئێزدیان نەھاتیە ئامادەکرن.”
ھەروھا ھشیاری دا کو ئەڤ بریار دێ کێشەیێن ئێزدیان کوورتر بکە و د ھەمان دەمێ دە دێ ببە سەدەما لاوازکرنا ناساندنا ناڤدەولەتی یا جینۆسایدا ئێزدیان. میر حازم ب دەنگەکی بلند گۆت: “ئەم تەڤلیکرنا ب زۆرێ رەد دکن.”
سپاسی ژ بۆ ھەرێما کوردستانێ
د داویا ئاخافتنا خوە دە، میر حازم تەحسین بەگ سپاسیەکا تایبەت پێشکێشی ھەرێما کوردستانێ کر ژ بۆ پێشوازیکرن و ھەمبێزکرنا ئێزدیان، ب تایبەتی خەلکێ شنگالێ. ھەروھا سپاسیا سەرۆکێ ھەرێما کوردستانێ نێچیرڤان بارزانی کر ژ بۆ رۆلا وی د رزگارکرنا ھەژمارەکا مەزن یا ئێزدیێن ژ دەستێ داعشێ رەڤاندی دە.
