تیمەکە شێورمەندێن ئامەریکایێ ب وەزیرێ پێشمەرگە رە رادگهینە کو، ب هەڤپاری و هەڤکاری ل گەل پێشمەرگەیان دکارن پێڤاژۆیا چاکسازیێ د ناڤ وێ هێزێ دە بلەزینن. وەزیرێ پێشمەرگەیێ حکوومەتا هەرێما کوردستانێ ژی دبێژە کو، ئارمانجا یەککرنا هێزێن پێشمەرگەیان ئاڤاکرنا ئارتێشەکە نشتمانی یا هەڤگرتییە.
ل گۆری راگهاندنا وەزارەتا پێشمەرگە، وەزیرێ پێشمەرگەیێ حکوومەتا هەرێما کوردستانێ شۆرەش ئیسماعیل ب هەڤپاری ل گەل سەرۆکێ ئەرکانان یێ وەزارەتا پێشمەرگە فەریق روکن عیسا عوزێر ل کۆنسولخانەیا گشتی یا ئامەریکایێ ل هەولێرێ ب سەرۆکێ نڤیسینگەها ئالیکاریێن ئەولەهیێ کۆلۆنێل دەك پێلک رە جڤیا.
د وێ جڤینێ دە، کو تیمەکە شێورمەندێن هەڤپەیمانان ل هەرێما کوردستانێ و ئەفسەر و پلەدارێن هێزێن پێشمەرگەیان ژی تەڤلی وێ ببوون، یاداشتنامەیا هەڤفێمکرنێ یا د ناڤبەرا وەزارەتا پێشمەرگە و وەزارەتا بەرگریێ یا ئامەریکایێ دە هات نرخاندن و پێنگاڤێن بجیهانینا وێ پەیمانێ هاتن نیقاشکرن.
ل گۆری وێ راگهاندنا وەزارەتا پێشمەرگە، وەزیرێ پێشمەرگەیان د وێ جڤینێ دە ئەو یەک پشتراست کر کو، وەزارەتا پێشمەرگە پێنگاڤێن باش ژ بۆ یەککرنا هێزێن پێشمەرگەیان ئاڤێتنە و ب بەرپرسیاری ژ بۆ بجیهانینا بەرنامە و پلانێن ستراتەژیکێن وەزارەتێ د ڤی واری دە دخەبتە. ئاماژە ژی دا کو، ئارمانجا وەزارەتا پێشمەرگە د یەککرنا هێزێن پێشمەرگەیان دە ئاڤاکرنا ئارتێشەکە نەتەوەیی یا هەڤگرتییە.
تیما شێورمەندانا هێزێن هەڤپەیمانان ل هەرێما کوردستانێ ئاماژە دا کو، ئەو ب گرینگی ڤە ل بزاڤێن وەزارەتا پێشمەرگە دنێرن، ژ بۆ بجیهانینا وان پلانانێن کو ئەو وەزارەت د بەرنامەیا خەباتێ دە و خاسما ژی د بەندێن یاداشتنامەیا هەڤفێمکرنێ دە ل سەر دخەبتە. ئاماژە ژی دا کو، ب هەڤپاری و هەڤکاری ب پێشمەرگەیان رە دکارن پێڤاژۆیا چاکسازیێ یا پێشمەرگەیان بلەزینن.
