ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان ل بنگەھەکێ لەشکەری یێ باژارکێ تل تەمرێ یێ رۆژئاڤایێ کوردستانێ مانۆرەکا لەشکەری یا ھەڤپار ئەنجامدا.
ئاژانسێن نووچەیان ئەشکەرە کر کو، ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان ل بنگەھا لەشکەری یا قەسرەکێ ل باژارکێ تل تەمر یێ باکورێ باژارێ حەسەکێ ل رۆژئاڤایێ کوردستانێ و دەردۆرا وێ مانۆرەکا لەشکەری یا ھەڤپار ئەنجامدا و بالافرێن شەری گەلەک نزم ل ھنداڤی دەڤەرێ فرین.
خەلکێ دەڤەرێ ئاماژە دا کو ژ بلی نزمیا بالافران، وان گەلەک دەنگێ تەقین و چەکان ژی بھیستیە. ژ بەر ڤێ یەکێ ژی، وان زانیە کو مانۆرەکا لەشکەری تێ کرن.
چاڤکانیێن نووچەیان ژی دبێژن، “ھێزێن ئۆپەراسیۆنا ئەرکێ گرێدایی (ئیرادەیا خورت) ل سبەھا ئیرۆ (سێشەمبێ، 26ێ تەباخا 2025ێ) ل سەر مالپەرا خوە یا فەرمی پارڤە کریە کو، ئۆپەراسیۆنا ھەڤپارا شەڤا بۆری یا د ناڤبەرا ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان دە ژ بۆ پێشخستنا شیانێن لەشکەری یێن ھەردو ئالیانە.”
د وێ پەیامێ دە ھەروەسا ھاتیە گۆتن کو، ئەو ئۆپەراسیۆنا ھەڤپار بزاڤەک بوو ژ بۆ زێدەکرنا شیانان پێخەمەتی شکاندنا داعشێ و ھەروەسا پاراستنا ئەولەھی و تەناھیا دەڤەرێ.
