ل پایتەختا ئوردنێ، عەممانێ، هەڤدیتنەک د ناڤبەرا شاندەیەکە ئامەریکی و شاندەیەکە رێڤەبەریا خوەسەر دە پێک هات و مژارێن تەڤلیبوونا دەمۆکراتیک و سیستەما نەناڤەندی هات گۆتووبێژکرن.
شاندەیا ئامەریکی کو ژ سەناتۆرا ئامەریکایێ جێن شاهین و ئەندامێ کۆنگرەیا ئامەریکایێ جۆ وێلسۆن پێک دهات رۆژا 25ێ تەباخێ ل عەممانێ شاندەیا رێڤەبەریا خوەسەر رە جڤیا، کو ژ فەرماندارێ گشتییێ هه‌سه‌دێ مەزلووم عەبدی و هەڤسەرۆکا دائیرەیا تێکلیێن دەرڤە ئیلهام ئەحمەد پێک دهات.
پشتی جڤینێ هاتبوو دیارکرن کو د هەڤدیتنێ دە پێکانینا پەیمانا 10ێ ئادارێ یا د ناڤبەرا فەرماندارێ گشتییێ هه‌سه‌دێ مازلووم عەبدی و سەرۆکێ قۆناغا ڤەگوهێزا شامێ ئەحمەد شەرع هاتیە گۆتووبێژکرن. هەر وها شاندەیا ئامەریکایێ پشتگریا خوە یا ب هه‌سه‌دێ رە نیشان دایە.
ل گۆری ئاگاهیێن کو چاڤکانیەکێ دانە مەدیایا نێزیکی رێڤەبەریا خوەسەر، د هەڤدیتنێ دە دانووستاندنێن د ناڤبەرا رێڤەبەریا خوەسەر و حکوومەتا شامێ دە، ئاستەنگیێن دەردکەڤن هۆلێ و چارەسەریا پرسگرێکان ژی هاتنە گۆتووبێژکرن.
د چارچۆڤەیا پەرگالا نەناڤەندی دە مژارا تەڤلیبوونێ هاتیە گۆتووبێژکرن و ل سەر چاوانیا وێ هاتیە راوەستاندن.
چاڤکانیێ دا زانین، هەولدانێن ژ بۆ هەڤدیتنێن رێڤەبەریا خوەسەر و حکوومەتا شامێ بەردەوام دکن، لێ ئەڤ هەڤدیتن وێ کەنگی پێک وەرە،نە دیارە.
