پێڤاژۆیا ئاشتیێ یا ترکیەیێ رێیێن 15 گوندێن ئامێدیێ ڤەکرن
ل دەڤەرا بنارێ چیایێ گارێ، د سینۆرێ قەزایا ئامێدیێ دە، 15 گوندێن کو ژ بەر شەرێ د ناڤبەرا ئارتێشا ترکیەیێ و په‌كه‌كێ دە هاتبوون گرتن، نها رێیێن وان ڤەبوونە. پشتی راوەستاندنا شەر، جۆتکار و نشتەجهێن گوندان ب ڤێ پێشکەتنێ گەلەکی کێفخوەشن و هێڤیا ژیانەکە ئارام و زیندی ژ نوو ڤە شین بوویە.
پێشتر، ژ بەر شەر و پەڤچوونان، جۆتکاران تەنێ چەند ساعەتان دکاریبوون بچن باخ و زەڤیێن خوە دا کو کارێن چاندنی ئان چنینا بەرهەمێن خوە بکن و بگهینن بازاران. لێ ئیسال، پێڤاژۆیا ئاشتیێ یا ل ترکیەیێ، باندۆرەکە ئەرێنی ل سەر رەوشا جۆتکار و نشتەجهێن گوندان، هەروه‌ها ل سەر بەرهەمێن چاندنیێ یێن دەڤەرێ کریە.
د ناڤا هەفتەیەکێ دە، هەژمارەکە مەزن ژ خەلکێن وان 15 گوندێن بنارا چیایێ گارێ ڤەگەریانە سەر مال و زەڤیێن خوەیێن چاندنیێ.
پەیامنێرێ كوردستان 24 دا زانین، سماق، بەرهەما هەری بەربەلاڤا چاندنیێ یا دەڤەرێ یە. ل گۆری ئامارێن رێڤەبەریا چاندنیێ یا دهۆکێ، داهاتا بەرهەما سماقێ یا دەڤەرێ دگهیژە 500 ملیۆن دیناری.
وەلاتیەکی گوندێ دێرەشێ، کو ژ بەر ئێریشێن فرۆکە و تۆپێن ترکیەیێ گەلەک زیان گهیشتبوو مال و زەڤیێن وان، ژ كوردستان 24 رە گۆت: “ئەڤ هەفتەیەکە خەلکێ گوند ڤەدگەرن سەر مالێن خوە. دەڤەر ئارام بوویە.” وی ئانی زمان ژی، هەر 15 گوند خوەدی بەرهەمێن سماق، گووز و تری نە”.
هەروها وی گۆت: “ئەم کێفخوەشن کو نها ئەم بێ ترس دکارن بچن ناڤ باخێن خوە و کارێن چاندنیێ بکن”.
وی وەلاتی هەر وها دەستنیشان کر، ژ بەر تۆپباران و ئێریشێن فرۆکەیێن ترکیەیێ، گەلەک زیان گهیشتیە وان گوندان و گۆت: “مالا مە ژی هاتبوو بۆمبەبارانکرن، لێ ئەم نەمرن. ئەڤ 20 رۆژن تۆپ و فرۆکە مە بۆمبەباران ناکن و ئەم بێهنا خوە ڤەددن”.
