سەرۆکێ گشتی یێ پارتیا سۆسیالیستا کوردستانێ (PSK) بایرام بۆزیەل ئیرۆ 30ی تەباخێ، داخویانیەک نڤیسکی ب ھەلکەفتا 1ی ئیلۆنێ، رۆژا ئاشتیێ یا جیھانێ، بەلاڤ کر و تێ دە تەکەز کر کو ئاشتیەکا ماییندە ل رۆژھلاتا ناڤین تەنێ ب چارەسەریەکا عادل و وەکھەڤ یا پرسگرێکا کورد پێکانە.
د داخویانیێ دە ھات دەستنیشانکرن کو مرۆڤاھی ژ ئاشتیێ دوورە و چاڤکانیێن کو دڤێت ژ بۆ خۆشگوزەرانیێ بێن خەرجکرن، د شەر دە تێن بکارئانین. بۆزیەل سەدەما بنگەھین یا شەر و پەڤچوونێن سەدسالی یێن ل ھەرێمێ ب “بنپێکرنا مافێن نەتەوەیی یێن گەلێ کورد و پارچەکرنا کوردستانێ” ڤە گرێ دا و گۆت کو پۆلیتیکایێن ئینکار و زۆرداریێ بوونە سەدەما ئێشێن مەزن نە تەنێ ژ بۆ کوردان، لێ ژ بۆ تەڤاھیا ھەرێمێ.”
داخویانیا سەرۆکێ گشتی یێ پەسەکێ بایرام بۆزیەل:
ئاشتیەکا ماییندە دکارە ل سەر بنگەھا ئازادی و وەکھەڤیێ بێ ئاڤاکرن
د 1ی ئیلۆنێ رۆژا ئاشتیا جیھانێ دە، مرۆڤاھی ھین ژی ژ ئاشتیەکا ماییندە و دۆمدار گەلەک دوورە. د شەرێن کو ل چار ئالیێ جیھانێ و ل ھەرێمێ دقەومن دە ھەر رۆژ ب ھەزاران سڤیل، ژن و زارۆک ب ھۆڤانا تێن کوشتن. چاڤکانیێن ئابۆری یێن کو دڤێت ژ بۆ باشیا مرۆڤاھیێ، پەروەردە، تەندورستی و خوارنێ وەرن خەرجکرن، ژ بۆ چەک و شەران تێنە بکار ئانین.
سەدەما بنگەھین یا شەر و توندوتیژیا سەدسالی ل رۆژھلاتا ناڤین بنپێکرنا مافێن نەتەوەیی یێن گەلێ کورد و پارچەکرنا کوردستانێیە. پۆلیتیکایێن ئینکار و زۆرداریێ یێن کو د سەدسالا بۆری دە ل دژی ھەبوون و مافێن گەلێ کورد ھاتنە مەشاندن نە تەنێ ژبۆ گەلێ کورد ئێشێن مەزن پەیدا کرنە، د ھەمان دەمێ دە چەرخەک بێداوی یا پەڤچوون و توندوتیژیێ ل ھەرێمێ پێک ئانییە.
د رۆژا ئیرۆیین دە گەلێ مە ل باشوورێ کوردستانێ ستاتویەک فەدەرە و ئازاد ب دەست خستیە، لێ بەلێ ل وەلاتێن دن پۆلیتیکایێن ئینکار و توندووتووژیێ ل دژی گەلێ کورد بەردەوام دکن.
رەژیما پاشڤەروو یا ل ئیرانێ ھەر رۆژ ب دارڤەکرنا جوان و ژنێن کورد بەرسڤێ ددە داخوازێن ھەری مەعسومانە یێن گەلێ کورد. تەڤی ھلوەشینا دیکتاتۆریا 61 سالی یا ئەسەد ل سووریەیێ، بێتەحەموولیا ل ھەمبەر ھەبوون و مافێن گەلێ کورد بەردەوام دکە. ھەر چەند ھلوەشینا دیکتاتۆریا ئەسەد ژ بۆ ھەمی کۆمێن نەتەوەیی و ئۆلی دەرفەتەک پەیدا کر کو رەژیمەک دەمۆکراتیک و پرئالی بهێت ئاڤا کرن ژی، ھەلوەستا دژمنانەیا ل ھەمبەر گەلێ کورد ئاتمۆسفەرا ئەرێنی یا ھەیی ژەھری دکە. ھێزێن کو ھەبوونا خوە ل سەر شەری و توندووتووژیێ ئاڤا کرنە، ئاگری گەش دکن دا کو سووریەیێ بکشینن ناڤ شەرەکی نوو.
د سەدسالا بۆری دە، پۆلیتیکایێن توندوتیژی و پەڤچوونێ یێن دژی کورد ل ترکیەیێ نە تەنێ ئێشێن مەزن ژبۆ گەلێ کورد پەیدا کرن، لێ د ھەمان دەمێ دە ترکیە د ھەر واری دە خستنە ناڤ زڤرۆکەکا کوور.
رایەدارێن ترکیەیێ، ئەڤ دەمەکە کو ژبەر گەشەدانێن ھەرێمی یێن داوی ب ئارمانجا چەکبەردانا پەکەکێ دەست ب پێڤاژۆیەکێ کرنە. کۆمیتەیەک پارلامەنتۆیێ کو ژ بۆ ئاڤاکرنا بنگەھا قانوونی یا ژ بۆ چەکبەردانا پەکەکێ ھاتیە دامەزراندن، جڤینێن جووربەجوور ل دار دخە.
بێ گومان گرینگە کو پەکەکە دەست ژ چەک بەردە و پەڤچوون ب داوی بێن. دڤێت شەر و پەڤچون کو زییانێن مەزن یێن جانی و مالی دایە گەلێ کورد ، ب تەڤاهی بقەدە و دڤێت رێ ل بەر سیاسەتا دەمۆکراتیک وەرە ڤەکرن. لێبەلێ، ژ بەر نەبوونا ئاسۆ و چارەسەریەک بەرفرەھ ژ بۆ پرسگرێکا کوردا حکوومەتێ، پێڤاژۆیا بێچەککرنا پەکەکێ ل گۆری پلانان برێڤە ناچە.
وەکی پەسەکە ئەم دخوازین دوبارە بکین کو مەسەلەیا بنگەھین، ئازادیا نەتەوەیی یا گەلێ کوردە. چاڤکانیا ھەموو پرسگرێکێن ھەیی، سیاسەتا سەدسالانەیا رەد، ئینکار، ئاسیمیلاسیۆن و توندووتووژیێ یا ل دژی گەلێ کوردە. ئاشتیەک ماییندە، بێیی بداویکرنا نەحەقیێن دیرۆکی یێن سەدسالانە یێن کو ل گەلێ کورد ھاتنە کرن، نایێ ئاڤاکرن. بێیی ناسکرنا مافێن گەلێ کورد یێن ژ ناسنامەیا وی یا نەتەوەیی دەرتێ، ل ھەرێمێ ئارامی پێکنایێ. ھەتا کو پرسگرێکا کورد ب ئاوایەکی دادی و وەکھەڤ نەیێ چارەسەرکرن، کەس نکارە ئاشتیێ ببینە.
کلیدا ئاشتی و ئارامیا ل رۆژھلاتا ناڤین د وێ یەکێ دایە کو گەلێ کورد بکاربە ل وەلاتێ خوە ل کوردستانێ دا ب ئاوایەکێ ئازاد بژی. سەرکەفتنا پێڤاژۆیا بێچەککرنا پەکەکێ ژی د ھەمان دەمێ دە تێگھیشتنەک پرئالی ژبۆ پرسگرێکا کورد دڤێت. پێڤاژۆیا بێچەککرنێ تەنێ ب دەستپێشخەرییا نڤیساندنا دەستوورەک نوو کو ھەبوونا نەتەوەیی و مافێن گەلێ کورد ناس بکە، دکارە سەرکەڤە.
ب مناسەبەتا 1ی ئیلۆنێ، رۆژا ئاشتیێ یا جیھانێ، ئەم ھەموو ئاکتۆرێن سیاسی یێن ل ترکیەیێ ڤەدخوینن کو ئیرادەیەک ئاڤاکەر و بباندۆر د دەربارێ پرسگرێکا کورد دە نیشان بدن. بلا نەیێ ژبیر کرن: گەر کورد ئازاد نەبن، ئازادیا ترکان ژی خەونەکە.
د ڤێ دەمێ دە کو ھەرێما مە ژ قۆناغەکا گرینگ دەرباس دبە، ئەم بانگ ل ھەمی ئاکتۆرێن سیاسی یێن کورد دکن: وەرن ئەم دەستێن خوە بدن ھەڤ و گوھ بدن بانگا دیرۆکێ دا کو ئەم ژ بۆ ئازادیا نەتەوەیی یا گەلێ خوە رەوشا ھەیی ب کاریگەر بکار بینن.
ئەڤ تشت ھەمان دەمێ دا ھێڤی و داخوازا گەلێ مەیە.
نابە کو ئەم دەرەنگ بمینن…
