ھێزێن سووریەیا دەمۆکراتیک (ھەسەدێ)، ب ھەڤکاریا ھێزێن ئەولەکاریا ھوندرین (ئاسایش) و یەکینەیێن پاراستنا ژن (یەپەژێ)، د چارچۆڤەیا ئۆپەراسیۆنەکا بەرفرەھ دە ل باژارێ حەسەکێ و دەردۆرا وێ، 39 ئەندامێن شانەیێن ڤەشارتی یێن داعشێ گرتن.
ناڤەندا راگھاندنێ یا ھەسەدێ ب داخویانیەکێ راگھاند، ئۆپەراسیۆنا لێگەرینێ یا ل دژی شانەیێن داعشێ ددۆمە. د داخویانیێ دە ھات دەستنیشانکرن کو تیمێن ئۆپەراسیۆنێن تایبەت (TOL) ژی ژ بۆ پشتگریا ئیستیخباراتی بەشداری ئۆپەراسیۆنێ بوونە.
ئارمانجا ئۆپەراسیۆنێ پاراستنا سڤیلانە
ھەسەدێ ئارمانجا ئۆپەراسیۆنێ وھا راڤە کر: “ئارمانج، سەرداگرتنا بەرماھیێن رێخستنا داعشێ، تێکبرنا ژێدەرێن وان یێن لۆجستیک و بێباندۆرکرنا پلانێن وان یێن ئێرشێن ل سەر گرتیگەھانە.”
د داخویانیێ دە ھات تەکەزکرن، ئەڤ ئۆپەراسیۆن ژ بۆ پاراستنا ئەولەھیا وەلاتیان و سەقامگریا ھەرێمێ تێ لدارخستن.
ھەسەدێ ھەروھا بانگ ل خەلکێ حەسەکێ کر، لگەل ھێزێن وان ھەڤکاریێ بکن و ھەر تەڤگەرەکا ب گومان دەملدەست راگھینن، و ئانی زمان کو “ئەولەھی و سلامەتیا شێنیان ئارمانجا مە یا پێشینە.”
ل گۆری داخویانیەکا دن یا ھەسەدێ، د ئەنجاما ئۆپەراسیۆنێ دە ھەتا نھا 39 چەتە ھاتنە گرتن و هندەک چەک و جەبلخانە ژی ھاتیە دەستەسەرکرن.
ھەسەدێ دا زانین کو ئۆپەراسیۆن ژ بۆ پاقژکرنا ھەرێمێ ژ شانەیێن ڤەشارتی دێ بەردەوام بکە.
