ئەندامێ فەرمانداریا گشتی یا ھێزێن سووریەیا دەمۆکراتیک (ھەسەدێ) سیپان حەمۆ، دەربارێ نیقاشێن ل سەر یەکخستنا ھێزێن لەشکەری ل سووریەیێ دە، ھەلوەستا ھەسەدێ ئاشکەرە کر و راگھاند، ئەو یەکخستنا ل سەر بنگەھا خوەرادەستکرنێ رەد دکن و تەنێ ” یەکخستنا دەمۆکراتیک” قەبوول دکن.
د ھەڤپەیڤینەکا تایبەت دە، سیپان حەمۆ دیار کر، تێگھیشتنا ھەسەدێ یا ژ بۆ ” یەکخستنێ” ژ یا ئالیێن دن جودایە و گۆت، “یەکخستنا ھەری باش ئەوە کو ب ئیرادەیا گەلان و ل سەر بنگەھا ھشمەندیەکا ئازاد پێک تێ. لێ بەلێ، نێرینا ل شامێ سەروەرە، ل سەر ئەساسێ ‘دڤێت ھەر کەس تەڤلی دەولەتا ناڤەندی ببە’ ھاتیە ئاڤاکرن. ئەڤ ھشمەندیەکا بەیعەتکرنێ یە و نکارە ھەموو جڤاکێ ھەمبێز بکە.”
ھەروھا سیپان حەمۆ حکوومەتا شامێ ب ڤالادەرخستنا پەیمانا 10ێ ئادارێ تاوانبار کر و ئاماژە ب کۆمکوژیێن ل دژی گەلێ عەلەوی ل ھەرێما بەراڤێ و ئێریشێن ل سەر سووەیدایێ کر و ھەروھا رەشنڤیسا دەستووری یا یەکالی و بێبەشدارکرنا باکور و رۆژھلاتێ سووریەیێ ژ ھلبژارتنان، وەکە دەلیلێن ڤێ ھشمەندیا دووری دەمۆکراسیێ ب ناڤ کر.
“ئارتێش نەینکا سیستەما سیاسییە”
سیپان حەمۆ تەکەز کر، بەریا نیقاشکرنا یەکخستنا ئارتێشێ، دڤێت سیستەما سیاسی یا وەلاتی بهێت چارەسەرکرن. ل گۆری حەمۆ، ئارتێش نەینکا سیستەما سیاسییە و دڤێت ل سەر قانوونێن دەمۆکراتیک بهێت ئاڤاکرن و گۆت “ھەیا کو د قانوونان دە گوھەرتنێن بنگەھین چێنەبن و سیستەمەکا سیاسی یا نەناڤەندی کو مافێ ھەموو پێکھاتەیان (کورد، عەرەب، سوریان، ئەرمەن، عەلەوی، دورزی) ناس دکە، نەیێ ئاڤاکرن، نیقاشکرنا ئەنتەگراسیۆنا ھەسەدێ بێواتەیە.”
ھەروھا سیپان حەمۆ دا زانین، ھەسەدە ب ئەزموونا خوەیا مەزن یا د شەرێ دژی داعشێ و رەژیما بەعس دە، دکارە ببە بنگەھا ئارتێشەکا نوو و پیشەیی ژ بۆ تەڤاھیا سووریەیێ. وی وەکە گاڤەکا دەستپێکێ پێشنیارا ئاڤاکرنا “مەجلیسەکا لەشکەری یا ھەڤبەش” لگەل ئارتێشا حکوومەتا شامێ کر، لێ دەستنیشان کر کو پێکانینا ڤێ یەکێ ب ڤینا سیاسی ڤە گرێدایییە.
رۆلا ھێزێن دەرڤە و بانگا ل ترکیەیێ
دەربارێ رۆلا ھێزێن ناڤدەولەتی دە، سیپان حەمۆ بەرپرسیاریا سەرەکی خستە ستوویێ ھەڤپەیمانیا ناڤدەولەتی و ئامەریکایێ و بانگ ل وان کر کو ژ بۆ گەلێ سووریەیێ ژی ھەمان پیڤانێن دەمۆکراتیک یێن کو ژ بۆ خوە دخوازن، بپەژرینن.
حەمۆ ب تایبەتی بانگ ل ترکیەیێ کر و گۆت: “مە وەکە ھەسەدێ چ جاران گەف ل سەر دەولەتا ترک دروست نەکریە. گەر ترکیە ل سووریەیێ ئاشتی و ئارامیێ دخوازن، دڤێت ھەبوونا کوردان ژ بۆ خوە وەکە مەترسی نەبینە. دڤێت باوەر بکە کو کورد بنگەھا دەمۆکراتیکبوونا سووریەیێ نە.”
