عه‌بدوللا ئۆجالان ئیرۆ په‌یام دا كۆنفه‌رانسا ناڤه‌ندا لێكۆلینان یا رووداوێ و بانگی هه‌موو كوردان كر كو ل گه‌ل ده‌وله‌تێن داگیركه‌ر بن و ل گه‌ل وان د ناڤ یەکیتی و هەڤگرتنێ دا بن.
ناڤەندا لێکۆلینان یا رووداوێ ل سەر پێڤاژۆیا ل ترکیە و باکورێ کوردستانێ كو تركیه ناڤێ پێڤاژۆیا تركیه‌یا بێ ته‌رۆر لێ دكه‌ت، کۆنفەرانسەک ب ناڤێ “ئاشتیا ترکیەیێ یا کو ب زەحمەتی ب دەست دکەڤیت” ل دار خست.
عه‌بدوللا ئۆجالان ژی بۆ کۆنفەرانسێ پەیامەکا نڤیسکی شاند و پەیام ژ ئالیێ پارلامانەتەرێ دەم پارتیێ میتهات سانجار ڤە هات خواندن.
ئۆجالان د په‌یاما خوه دا جاره‌كا دن ته‌كه‌زی ل سه‌ر جڤاكا ده‌مۆكراتیك كرییه و چ به‌حسا مافێن كوردان د ڤێ پێڤاژۆیێ دا نه‌كر.
ئۆجالان بانگ ل كوردان كر و گۆت: «تەرجیحا من ئەوە کو کورد، ب وان دەولەتێن کو دەرفەتا پێوەندیەکە ل سەر بنگەها جڤاکا دەمۆکراتیک ددن وان رە، د ناڤ یەکیتی و هەڤگرتنێ دە بن. ئەز ڤێ یەکێ وەکی “ئەنتەگراسیۆنا ل سەر بنگەها جڤاکا دەمۆکراتیک” پێناسە دکم. پێڤاژۆیا کو ئەم نها دمەشینن دسپێرم سەر ڤی ئەساسی و ئەز د وێ باوەریێ دە مە کو دێ ب سەر بکەڤە».
ئه‌ڤ ئاخافتنێن ئۆجالان ب وێ واته‌یێ دهێن كو دڤێ كورد ل گه‌ل ده‌وله‌تێن داگیركه‌ر بن، ده‌ست ژ مافێن خوه یێن نه‌ته‌وی به‌رده‌ن و د ناڤا وان دا ئاسمیله ببن، ل گۆری ئۆجالان ئه‌ڤ ئاسمیلاسیۆن ب جڤاكا ده‌مۆكراتیك تێ پێناسه كرن.
ئۆجالان د داویا په‌یاما خوه دا ژی گۆتیه: «ل گۆری من، دڤێ پێوەندیێن د ناڤبەرا کوردان دە ژی د شێوەیێ یەکیتیەکە ل سەر بنگەها دەمۆکراتیک دە بن. ئەز بانگی هەموو کوردان دکم کو ل سەر زەمینەکە دەمۆکراتیک بجڤن و ببن یەک».
عه‌بدوللا ئۆجالان ل 27 سباتا ئیسال 2025ێ ب راسپارده‌یا باخچه‌لی و ئاردۆگان یه‌كه‌م په‌یام دا و ژ رێخستنا خوه خوه‌ست خوه فه‌سخ بكه و ژ وان را گۆت: «مۆدێلا وه نه‌مایه، چه‌كان ده‌ینن»!.
ژ وێ ده‌مێ ڤه، 4 په‌یامێن دن ژ ئیمرالیێ ده‌ركه‌تنه، ئۆجالان د چ یێك ژ وان په‌یامان ده به‌حسا مافێن كوردان نه‌كر، به‌لكو د هه‌موو په‌یامان دا ته‌كه‌ز ل بێده‌وله‌تبوونێ و بێی نه‌ته‌وه‌یی بوونێ بۆ كوردان كر و گۆت: «ل شوونا نه‌ته‌ویا كورد ئه‌مێ نه‌ته‌وه‌یا ده‌مۆكراتیك ئاڤا بكن»!.
