وەزارەتا دادێ یا سووریەیێ دادوەر و فەرمانبەرێن کورد ژ دادگەھێن عەفرینێ دەردخە و دادوەر و فەرمانبەرێن عەرەب تینە جھێ وان؛ چاڤدێر ل وێ باوەرێ نە کو، تشتێ کو شام دکە پێڤاژۆیا عەرەبیکرنەکا بەرنامەکرییە.
وەزارەتا دادێ یا سووریەیێ د پێشڤەچوونەکا نوو دە ب بریارا ھەژمار 1479، کو ل رۆژا 26ێ تەباخا ئیسال دەرکەفتیە، فەرمانا دەرخستنا دادوەر و فەرمانبەرێن کورد ل دادگەھێن عەفرینێ، ب تایبەتی ژی ل جندرێس، موباتەلی، شەران و راجۆیێ، دەرخستیە.
وەزارەتا دادێ یا سووریەیێ د فەرمانا خوە دە فەرمان دا کو، دادوەر و فەرمانبەرێن کورد ژ دادگەھێن عەفرینێ بۆ یێن حەلەبێ بێن ڤەوگوھاستن. ھەروەسا ل دوو وێ فەرمانێ ژی، وەزارەتا ناڤبری ھەژمارەکا فەرمانبەرێن کورد ژ بۆ کارێن نەسەرەکی و نڤیساندنێ دھێلە.
چاڤدێرێن ناڤخوەیی ل وێ باوەرێ نە کو، ئەڤ فەرمان سیاسەتا عەرەبیکرنا رێڤەبەریا وێ دەڤەرێیە و شیانێن خوەجھی لاواز و بێبھا دکە. ئەڤ ژی د دەمەکێ دە کو پرانیا کوردێن وێ دەڤەرێ ژ بۆ ڤەگەراندنا مال و ملکێن خوەیێن بندەستکری و زەڤتکری خوە دسپێرن شیانێن ناڤخوەیی یێن دادگەھێن خوە. ڤێ پێنگاڤێ ژی نیگەرانیێن جدی پەیدا کرنە، کو گەلێن رەسەنێن دەڤەرێ دێ مافێن خوە ھەتا ھەتایێ وندا بکن.
ئەڤ رێکارێن دادوەری بەرەڤاژی وان سۆزانن یێن کو، سەرۆکێ سووریەیێ یێ نوو ئەحمەد شەرع د سەردانا خوەیا ڤێ داویێ یا عەفرینێ دە دابوون خەلکێ وێ دەڤەرێ، ب تایبەتی کو وی سۆز دابوو کو مال و ملکێن بندەستکری ب لەز ژ بۆ خوەدیێن وان یێن کورد ڤەگەرینە.
ئەحمەد شەرع د وێ سەردانا خوە دە لگەل سەرۆکێ شاخا ئەنجوومەنا نەتەوەیی یا کوردێن سووریەیێ (ئەنەکەسێ) ل عەفرین ئەحمەد حەسەن جڤیابوو و ل سەر بنپێکرنا مافێن مرۆڤان، بندەستکرنا ئەردێ و گرتنا کەیفی یا وەلاتیان نیقاش کرن. پشترە ئەحمەد شەرع پابەندبوونا رێڤەبەریا خوە ژ بۆ بداویکرنا ھەژمۆنا ملیسان و ڤەگەراندنا مافان ژ بۆ خوەدیێن وان تەکەز کربوو.
شارەزایێن قانوونی تەکەز دکن کو، دەستھلاتا دادوەریێ یا نھا وەکی ئاموورەکێ ژ بۆ گوھەرتنا دەمۆگرافیا دەڤەرێن کوردی تێ بکارئانین و ھەروەسا تەڤی فەرمانێن ئیداری، سیاسەتا دیفاکتۆ تێ سەپاندن کو خزمەتا ئارمانجێن حکوومەتا ناڤەندی یا شامێ ل وان دەڤەران یێن کو ئارێشە ل سەر ھەنە دکە.
