ل باژارێن مەهاباد، بۆکان، پیرانشار و شنۆیێ یێن رۆژهلاتێ کوردستانێ 58 کەس ژ بەر لخوەکرنا جلێن کوردان هاتن جەزاکرن.
دەزگەها دادوەریێ یا کۆمارا ئیسلامی یا ئیرانێ ب هنجەتا لخوەکرنا جلێن کوردان 58 جەزا کرن و ل هەر یەکی ژ وان 3 مەهـ جەزایێ گرتیگەهێ هات برین.
رێخستنا مافێن مرۆڤانا هەنگاوێ دۆهـ راگهاند، «ئەو 58 کەس ژ ئالیێ شاخا دادگەها شۆرەشێ یا پیرانشارێ ڤە هاتنە جەزاکرن لێ دکارن ل شوونا کو بکەڤن گرتیگەهێ، 24 میلیۆن تومەنان بدن».
2یێ کانوونا پاشین یا 2025ان د دۆزەکە هەڤبەش دە لێپرسین ب وان 58 کەسان رە هاتبوو کرن.
ل گۆری ئاگاهیان، ئەو کەس پشتی کو ل داوەتەکێ ل باژارێ پیرانشارێ یێ پارێزگەها ئورمیەیێ یا رۆژهلاتێ کوردستانێ ب کۆمی ب جل و بەرگێن کوردان و جەمەندانەیان دەرکەتبوون، دادگەها شۆرەشێ یا باژێر گازی وان کربوو.
ل گۆری رێخستنێن مافێن مرۆڤان یێن رۆژهلاتێ کوردستانێ، دۆزگەرێ گشتییێ پیرانشارێ موجتەبا مەحموودی ئەو کەس ب تۆهمەتا «پرۆپاگاندایا ل دژی کۆمارا ئیسلامی یا ئیرانێ» گازی دادگەهێ کربوون.
پرانیا جوان، کال و پیر، ژن و کەچان ب تایبەتی ل رۆژهلاتێ کوردستانێ جەمەدانان ب کار تینن، نەمازە د شاهیان دە.
لێ ناڤەندێن ئەولەهیێ یێن ئیرانێ گەلەک جاران لخوەکرنا جەمەدانانا د شاهیان دە ب هەبوونا پێوەندیان یا ب پارتیێن رۆژهلاتێ کوردستانێ ڤە گرێ ددن.
