پارتیا وەلاتپارێزێن کوردستانێ: ئەم ئێریشا نیژادپەرەستی یا 6 و 7ێ ئیلۆنا 1955 روورەش دکن

پارتیا وەلاتپارێزێن کوردستانێ (PWK)، د سالڤەگەرا 70یەمینا بوویەرێن 6 و 7ێ ئیلۆنا 1955 دە، ب داخویانیەکێ ئێریش و کۆمکوژیێن ل دژی گەلێن نەمسلمان یێن وەکە رووم، ئەرمەنی و جھوویان ھاتبوون کرن، شەرمەزار کر. PWK د داخویانیێ دە دەستنیشان کر کو ئەڤ ئێریش ژ ئالیێ “ھێزێن تاری یێن دەولەتا ترکییەیێ” ڤە ھاتنە ئۆرگانیزەکرن.

داخویانیا نڤێسینگەها راگەھاندنێ یا PWK وھایە:

ئەم ئێریشا نیژادپەرەستی یا 6 و 7ێ ئیلۆنا 1955ێ روورەش دکن

د رۆژێن 6 و 7ێ ئیلۆنا 1955ێ دە، ب ئۆرگانیزەکرنا ھێزێن تاری یێن دەولەتا ترکییەیێ و ب دەستێ نژادپەرەستێن ترک ڤە، ل باژارێن ستەنبۆلێ و ئیزمیرێ،، ل ھمبەری گەلێن کو نەمسلمانن (رووم، ئەرمەنی یەھوودی) قەتلیعام و ئێریشەکە نەمرۆڤانە ھاتە ل دار خستن.

د ڤان 2 رۆژان دە، نژادپەرەستێن ترک، 15 کەسێن نەمسلمان کوشتن نێزیکی 300 کەس بریندار کرن و دەست درێژی ل سەر سەدان ژنان کرن.

ھەروەھا د ڤان 2 رۆژان دە نژادپەرەستێن ترک 4112 خانی،1004 دکان، 73 دێر، سینەگۆگەک “پەرستگەها جووهیان”، 2 ماناستر، 26 دبستان، گەلەک قەبرستان، کارگەهـ، ھۆتێل، خوارنگەهـ و بار ژی د ناڤ دە، ئێریش برن سەر 5317 جیھ و واران، گەلەک دەر شەوتاندن، تالان کرن، خەراب کرن.

ھێزێن تاری و کوور یێن دەولەتا ترکییەیێ ب ڤان ئێریشێن نیژادپەرسەتی، ژ ئالییەکی ڤە خوەستن گەلێن نەمسلمان، ب تایبەتی ژی گەلێ رووم ژ ترکییەیێ دەرخینە، رێ ڤەکە کو ژ ترکییەیێ برەڤن، ھەرن؛ ژ ئالییەکی ڤە ژی خوەستن دەست دەینن سەر مال و ملکێن گەلێن نەمسلمان دا کو سەرمایە دەست بگوھەرینە، بکەڤە دەستێ ترکان.

ئەم د 70یەمین سالڤەگەرا ڤان ئێریش و قەتلیعامان دە، ھەموو ھێزێن ڤەشارتی و یێن ئەشکەرە یێن کو ئەڤ ئێریش پلان کرنە و بجیھ ئانینە، روورەش دکن.