عەڤدللا ئۆجالان، سەرۆکێ زیندانکری یێ پەکەکێ، سەلاحەدین دەمیرتاش، هەڤسەرۆکێ بەرێ یێ هەدەپێ ژ بەر داخویانیا وی یا د سالا 2015ێ دە یا د ناڤا پارلامانتۆیا ترکیەیێ کو تێ دە گۆتبوو، “ئەردۆگان هەیا کو نەفەسا هەدەپێ مابە د ڤی ولاتی دە ئەم تە ناکن سەرۆک، ئەم تە ناکن سەرۆک، ئەم تە ناکن سەرۆک”، رەخنە کر.
ئایتونج ئێرکین رۆژنامەڤان د رۆژنامەیا “سۆزجو” یا ترکیەیێ دە راگهاند، ئۆجالان دەما ب شاندا ئیمرالیێ رە جڤیای، د دەربارا دەمیرتاش دە ئاخڤییە و گۆتییە، دەمیرتاش شاشتی کریە کو ل دژی رەجەب تەییب ئەردۆگان سەکنیە و نەدبوو د سالا 2015ێ دە ب وی ئاوا ل دژی ئاردۆگان بسەکنە.
ئایتونج ئێرکین دبێژە، ئۆجالان د 6ی تەمووزێ دە، دەما ب شاندا ئیمرالیێ رە جڤییای، د دەربارا دەستەسەرکرنا دەمیرتاش دە ئاخڤییە و گۆتییە، “مژارەکە دن ژ ئەرۆگان رە شیرۆڤە بکن و ب وی بگهینن، باسی وێ قۆناغا دیرۆکی ژێ رە بکن، من د دبستانێن دەولەتێ دە خوەندییە و هەیانی ڤڕ ئانییە، ئەز دزانم دەولەت چەوا کوردان ناس دکە و من ئەڤ یەک فێم کرییە، ئەم دکارن ل دژی کەمالیستان بخەبتن، لێ بەلێ رێبازا رێبەرتیا من جودایە، دەما دەمیرتاش ژ ئەردۆگان رە گۆت، ئەم تە ناکن سەرۆک، ئەو شاش بوو، من وەکە ئۆجالان ئەڤ پرسگرێک تونەیە کو دبە سەرۆک یان نا، ئەز ب ئەردۆگان رە باسی ئەساسێ پرسگرێکان دکم و د ڤێ دەربارێ دە پێ رە دجڤم و نها ژی هوون ب نوونەرتییا من پێ رە دجڤن. جڤینێن من ب ئەردۆگان رە ژ بۆی ڤێ یەکێ نینە کو پارتیەک راستی شکەستنێ وەرە و پارتیەکە دن بسەربکەڤە، گەر ئەڤ پێک وەرە دڤێ د چارچۆڤەیا هەڤپەیمانیەکە دەمۆکراتیک دە بە. دەما ژ ئەردۆگان رە دبێژی ئەم تە ناکن سەرۆک، ئەڤ شاشتییا دەمیرتاش و سرری سوورەیا ئۆندەر بوو، نە حەوجەبوو ل دژی ئەردۆگان بسەکنن، ئەز باور دکم دەمیرتاش شاشتییا خوە فێم کریە.”
ئۆجالان، ژ شاندا ئیمرالیێ رە گۆتیە، بلا هوون ب ئۆزگوور ئۆزەل، سەرۆکێ جەهەپێ رە ژی بجڤن و سلاڤێن من ژێ رە هەنە و ژێ رە ببێژن کۆمپلۆیەکە مەترسیدار هەیە، لۆما دڤێ هەڤپەیمانیەکە دەمۆکرات پێک وەرە داکو ژ ڤێ کۆمپلۆیێ پاراستی بین.
