پارلامەنتەرێ دەم پارتیێ میتحەت سانجار د کۆمخەباتا پارتیا خوە یا ل ئەنقەرەیێ دە راگھاند، پێڤاژۆیەکا ئاشتیێ یا سەرکەتی تەنێ ب سۆز و گۆتنان پێک نایێ و تەکەزی ل سەر پێویستیا “یاسایێن ئاشتیێ” کر دا کو باوەری چێببە.
پارتیا وەکھەڤی و دەمۆکراسیێ یا گەلان (دەم پارتی) ئیرۆ ل ئەنقەرەیێ ب سەرناڤێ “پێدڤیێن یاسایی د پێڤاژۆیا ئاشتیێ و جڤاکا دەمۆکراتیک دە” کۆمخەباتەک گرینگ ل دار خست. د کۆمخەباتا کو گەلەک پارلامەنتەر، ئاکادەمیسیەن و پسپۆرێن یاسایی بەشدار بوون دە، گاڤێن ژ بۆ پێڤاژۆیەکا نوو یا چارەسەریێ ھاتن نیقاشکرن.
پارلامەنتەرێ دەم پارتیێ و یەک ژ ئەندامێن بەرێ یێ شاندا ئیمرالیێ، میتحەت سانجار، د ئاخافتنا خوە دە بال کشاند سەر گرینگیا بنگەھەکە یاسایی ژ بۆ پێڤاژۆیا ئاشتیێ. سانجار دەستنیشان کر کو ژ بۆ ھەموو ئالی بکاربن ب پرۆسەیێ باوەر بن و ئاشتی وەک سیستەمەکێ ب جھ ببە، دڤێت بنگەھا وێ یا یاسایی بهێت دانین.
سانجار گۆت: “تەنێ ب ئاخافتن و سۆزێن دەڤکی، باوەری دروست نابە. بنگەھ و باوەری ب یاسا و ب پلان و پرۆگرامێن جدی چێدبە. پرۆسە تەنێ ب گۆتن و سۆزان برێڤە ناچە.”
سێ قۆناغێن سەرەکی یێن “مافناسیا ئاشتیێ”
میتحەت سانجار، پێڤاژۆیا کو وەک “مافناسیا ئاشتی” بناڤ کر، د سێ قۆناغێن سەرەکی دە راڤە کر:
– داویانینا شەر و پەڤچوونان: “ژ بۆ ڤێ یەکێ پێویستی ب یاسایێن نوو ھەیە. مادەم توندی داوی دبە و شەرێ چەکداری نامینە، دڤێت سیاسەت بکەڤە شوونا وێ.”
– چارەسەرکرنا پرسگرێکا بنگەھین: “شەر ژ بەر خوە دەرناکەڤە، سەدەمێن شەری ھەنە. ئەڤ ژی پرسا کوردە. دڤێت پرسگرێکا کو بوویە سەدەما شەری بهێتە چارەسەرکرن.”
– ئاڤاکرنا ئاشتیەکا ماییندە و جڤاکا دەمۆکراتیک: “ئارمانجا داوی گھشتنا ئاشتیەکا ماییندە و ئاڤاکرنا جڤاکەکا دەمۆکراتیکە. مافناسی و دەمۆکراسی ل گەل ھەڤن و ھەڤ تەمام دکن.”
کۆمخەباتا دەم پارتیێ دێ ب نیقاشێن ل سەر مۆدەلێن چارەسەریێ و پێشنیارێن یاسایی یێن ژ بۆ پێشەرۆژێ بەردەوام بکە.
