ل پاریسا پایتەخت، ب ئامادەبوونا سەرۆک مەسعوود بارزانی و شارەدارا پاریسێ ئاننە ھیدالگۆ، کۆلانەکا نوویا ب ناڤێ “پێشمەرگە” ھات ڤەکرن. وەزیرێ پێشمەرگە یێ ھەرێما کوردستانێ ژی ئەڤ پێنگاڤ وەکە جھێ سەربلندیێ ب ناڤ کر.
وەزیرێ پێشمەرگە یێ ھەرێما کوردستانێ شۆرەش ئیسماعیل دوھ 6ێ ئیلۆنێ د کۆنفەرانسەکا رۆژنامەڤانی دە راگھاند، ناڤێ پێشمەرگە ل سەرانسەرێ جیھانێ بوویە سەمبۆلا لەھەنگیێ. ناڤێ پێشمەرگە ل سەرانسەرێ جیھانێ بوویە سەمبۆل. وەلاتیێن ئەورۆپی و ئامەریکی ڤی ناڤی باش ناس دکن.”
وەزیرێ پێشمەرگە ھەروھا دا زانین، پێشمەرگە ب ھەزاران شەھید د ئۆخرا تێکبرنا تەرۆریستان دە دانە و گۆت: “ناڤلێکرنا ھەر جھەکی ب ناڤێ پێشمەرگە جھێ سەربلندی و دەستخوەشیێیە.”
رۆژا ئینێ، 5ێ ئیلۆنا 2025ێ، ل پارکا ئاندرێ-جترۆین یا پاریسێ، مەراسیمەکا تایبەت ژ بۆ ڤەکرنا “کۆلانا پێشمەرگە” ھات لدارخستن. د مەراسیمێ دە سەرۆک مەسعوود بارزانی، شارەدارا پاریسێ ئاننە ھیدالگۆ، ھەژمارەکا مەزن ژ بەرپرسێن ئیداری، کەسایەتی و رەوشەنبیرێن فرانسی، شاندا پارێزگەھا ھەولێرێ، پێشمەرگەیێن دێرین و کوردێن ل ئەورۆپا و فرانسایێ دژین ئامادە بوون.
د دەستپێکا مەراسیمێ دە، سەرۆک بارزانی پەردە ل سەر تابلۆیا شەقاما پێشمەرگە راکر و ب فەرمی شەقام ڤەکر.
پشترە، شارەدارا پاریسێ ئاننە ھیدالگۆ گۆتارەک پێشکێش کر و رۆلا پێشمەرگە و ھەرێما کوردستانێ د تێکۆشینا ل دژی تەرۆرێ دە بلند نرخاند و ئەڤ پێنگاڤ وەکە رێزگرتنەکێ ژ بۆ قوربانیدانا پێشمەرگە ب ناڤ کر.
ھەروھا سەرۆک بارزانی ژی د گۆتارا خوە دە کێفخوەشیا خوە ژ بۆ سەردانا پاریسێ و ناڤلێکرنا شەقامەکێ ب ناڤێ پێشمەرگە ئانی زمان و سپاسیا گەل و حکوومەتا فرانسایێ کر. پشتی گۆتارا خوە، سەرۆک بارزانی وەکە رێزگرتن، مەدالیایەک پێشکێشی پێشمەرگەیەکی بریندارێ شەرێ ل دژی داعشێ کر.
