بەردەڤکا دەم پارتیێ عایشەگول دۆگان راگھاند، کۆمیسیۆنا ئاشتیێ یا پارلامەنتۆیێ ب تەنا سەرێ خوە نکارە پرسا کورد یا سەد سالان چارەسەر بکە، لێ ئەو دکارە ژ بۆ چارەسەریێ “رێیەکێ ڤەکە”.
پارتیا وەکھەڤی و دەمۆکراسیێ یا گەلان (دەم پارتی) دوھ، 6ی ئیلۆنێ، ل ئەنقەرەیێ ب سەرناڤێ “پێدڤیێن یاسایی د پێڤاژۆیا ئاشتیێ و جڤاکا دەمۆکراتیک دە” کۆمخەباتەکا گرینگ ل دار خست. د کۆمخەباتا کو گەلەک پارلامەنتەر، ئاکادەمیسیەن و پسپۆرێن یاسایی بەشدار بوون دە، گاڤێن پێویست ژ بۆ دەستپێکرنا پێڤاژۆیەکا نوویا چارەسەریێ ھاتن نیقاشکرن.
د پانەلا کو د چارچۆڤەیا کۆمخەباتێ دە ھات لدارخستن دە، بەردەڤکا دەم پارتیێ عایشەگول دۆگان ئاخڤی و ھەلوەستا پارتیا خوە دەربارێ کۆمیسیۆنا ئاشتیێ یا ل پارلامەنتۆیێ ھاتیە ئاڤاکرن دە ئەشکەرە کر.
دۆگان ئانی زمان کو ئەو ئاڤاکرنا کۆمیسیۆنێ وەکە گاڤەکا گرینگ دبینن، ژ بەر کو ئەو نوونەراتیا زێدەتری سەدی 90 یا وەلاتیێن ترکیەیێ دکە. لێبەلێ، وێ ھشیاری دا و گۆت: “دڤێت ئەم نەکەڤین وێ باوەریێ کو کۆمیسیۆنەکا ژ 51 کەسان پێک تێ، دکارە ب سەرێ خوە ئاستەنگیێن ل پێش چارەسەریا پرسا کورد راکە. ئەڤ کۆمیسیۆن نکارە پرسگرێکێن بنگەھین چارەسەر بکە، لێ ئەو دکارە ژ بۆ چارەسەریێ رێیەکێ ڤەکە.”
بەردەڤکا دەم پارتیێ رەخنەیێن توند ل ناڤەرۆک و نێزیکاتیا کۆمیسیۆنێ گرت و وھا ئاخڤی: “د ناڤێ کۆمیسیۆنێ دە پەیڤا ‘براتی’ ھەیە، لێ د پراکتیکێ دە ناھێلن دایک ب زمانێ خوەیێ زکماکی باخڤن. ئەڤ تێ وێ واتەیێ کو ئەو ‘برایەکی لال’ دخوازن.”
دۆگان تەکەز کر، دڤێت ھەر کەس بزانبە کو پرسا کورد نە پرسەکا ئەولەکاری و نە ژی پرسەکا تەرۆرێیە، بەلکوو پرسگرێکەکا بنگەھین یا ب سەدان سالانە.
عایشەگول دۆگان ھەروھا بال کشاند سەر کێماسیێن کۆمیسیۆنێ و گۆت کو ھێژ نەخشەرێیەکا وێ یا زەلال نینە و گۆت: “دەرخستنا گارانتیێن یاسایی ژ بۆ پێڤاژۆیێ پر گرینگە.”
