هەسەدێ و ھەڤپەیمانان مانۆرەکا لەشکەری یا ھەڤپار ئەنجامدا

ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان شەڤێدی ل باکورێ باژارێ حەسەکەێ یێ رۆژئاڤایێ کوردستانێ مانۆرەکا لەشکەری یا ھەڤپار ئەنجامدا.

ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان شەڤێدی یەکشەمبێ، 7ێ ئیلۆنا 2025ێ، ل بنگەھا لەشکەری یا ھێزێن ھەڤپەیمانان ل گوندێ قەسرەکێ ل دەردۆرا باژارکێ تل تەمەرێ ل باکورێ باژارێ حەسەکەێ یێ رۆژئاڤایێ کوردستانێ مانۆرەکا لەشکەری یا ھەڤپار ئەنجامدا.

ل گۆری زانیاریێن خەلکێ وێ دەڤەرێ، بالافرێن لەشکەری یێن ھەڤپەیمانان د دەما وێ مانۆرا لەشکەری یا ھەڤپار دە ل تل تەمەرێ پر نزم ل ئاسمانێ وی گوندی فرینە و بالافرێن شەری ژی ھەتا سبەھێ ل سەر وێ مانۆرێ بەردەوام بوونە.

چاڤکانیەکە لەشکەری یا ھێزێن سووریەیا دەمۆکراتیک (ھەسەدێ) راگھاند، “دەنگێ وان تەقینان ل بنگەھا لەشکەری یا قەسرەکێ د چارچۆڤەیا مانۆر و راھێنانێن لەشکەری یێن ھەڤپارێن د ناڤبەرا ھەسەدێ و ھێزێن ھەڤپەیمانان دەیە.”

ھێزا ئۆپەراسیۆنێن ھەڤپار د بەیاننامەیەکێ دە راگھاند، “ھەفتەیا بۆری ژی، ھێزێن سووریەیا دەمۆکراتیک (ھەسەدێ) و ھێزێن ھەڤپەیمانان مانۆرەکا لەشکەری یا وەکی ڤێ مانۆرا لەشکەری یا شەڤێدی ئەنجامدابوو، کو ژ بۆ دەما پێنج رۆژان بەردەوام بووبوو و تێ دە گەلەک بالافرێن شەر، تەقین و تەقە ھەبوون.”