ئەوێن ئێریشێ بنگەھێن پەترۆلێ ل ھەرێما کوردستانێ کرین ھاتنە دەستنیشانکرن

شێورمەندێ ئەولەکاریا نەتەوەیی یا ئیراقێ راگھاند، ئەو ئالیێن کو ئێریشێن ب درۆنان کرنە سەر زەڤیێن پەترۆلێ یێن ھەرێما کوردستانێ ھاتنە دەستنیشانکرن.

شێورمەندێ ئەولەکاریا نەتەوەیی یا ئیراقێ قاسم ئەعرەجی راگھاند، “ئەو کۆمیتەیا کو ژ ھێلا سەرۆکوەزیرێ ئیراقێ ڤە ژ بۆ لێکۆلینا ل سەر ئێریشێن ب درۆنان یێن ل سەر زەڤیێن پەترۆلێ یێن ھەرێما کوردستانێ ھاتیە چێکرن راپۆرتا خوە پێشکێش کریە، ئەو ئالی ژی دەستنیشان کرنە یێن کو ئەو ئێریش کرنە و ب ئانەھیا خودێ ئەو ئێریش جارەکا دن دوبارە نابن.”

شێورمەندێ ئەولەکاریا نەتەوەیی یا ئیراقێ ژ مەدیایا ئیراقێ رە گۆت کو، کۆمیتەیا وان سەردانا وان جھان کریە یێن کو ب درۆنان ئێریشی وان ھاتیە کرن و راپۆرتا خوە ب ئیمزایا ھەمی ئەندامێن وێ کۆمیتەیێ پێشکێش کریە.

قاسم ئەعرەجی ئاماژە ژی دا، “د وێ راپۆرتێ دە ئەو ئالی ھاتنە دەستنیشانکرنێن کو ئەو ئێریش کرنە و سینۆر ھاتنە دانین و ب ئانەھیا خودێ ئەو ئێریش جارەکا دن دوبارە نابن.”

ناڤبری رەد کر کو ناڤێ ئالیێن ئێریشکەر و جھێ ئاراستەکرنا وان ئێریشان، کا ژ ئاخا ئیراقێ یان ژ دەرڤەیی ئاخا ئیراقێ بوویە، ئەشکەرە بکە و راگھاند کو، ھەمی زانیاری وان د وێ راپۆرتێ دە ب بەرفرەھی ھاتنە بەحسکرن.

د ئێڤارا 14ێ تیرمەھا 2025ێ دە، د دەمژمێر 8:20 و 8:25ێ ئێڤارێ دە، دو بۆمبەبارانێن ب درۆنان ئێریشی زەڤیا پەترۆلێ یا خورمالا ل پارێزگەھا ھەولێرێ کرن. ل گۆری وەزارەتا چاڤکانیێن خوەزایی، “چ قوربانی چێنەبوونە و تەنێ بۆریێن ئاڤێ یێن سانترالێ زرار دیتنە.” ژ دەستپێکا تیرمەھێ ڤە، 38 ئێریشێن ب درۆن و مووشەکان ل سەر باژارێن ھەرێما کوردستانێ ھاتنە کرن، نەھ ژ وان ئێریشان ژی ل سەر زەڤیێن پەترۆلێ ھاتبوون کرن، ئەو ژی زەڤیێن خورمەلە، کۆرمۆر، سەرسنک، ئەترووش، بای حەسەن، پێشخابوور، تاوکێ و ھونت ئۆل بوون. ئێریشێن دن ژی ل سەر ھێزێن ئەولەھیێ و بالافرخانەیان ھاتنە کرن.

شاندەکە پایەبلندا ئیراقێ ب سەرۆکاتیا شێورمەندێ ئەولەکاریا نەتەوەیی قاسم ئەعرەجی ل رۆژا دوشەمبێ 28ێ تیرمەھا 2025ێ، گھیشت ھەولێرێ و ژ ئالیێ وەزیرێ ناڤخوە یێ حکوومەتا ھەرێما کوردستانێ رێبەر ئەحمەد ڤە پێشوازیا وی ھات کرن.

قاسم ئەعرەجی د کۆنفەرانسەکا رۆژنامەڤانی یا ھەڤپار دە لگەل رێبەر ئەحمەد راگھاند، “ئێریشێن ب درۆنانێن ل سەر ھەرێما کوردستانێ زرارێ ددن ناڤوودەنگ و ئابۆریا ئیراقێ. ئەم وان ئێریشان شەرمەزار دکن و ئێریشکەر دێ بێن سزادان.”

ژ دەستپێکا تیرمەھێ ڤە، 38 ئێریشێن ب درۆن و مووشەکان ل سەر باژارێن ھەرێما کوردستانێ ھاتنە کرن، نەھ ژ وان ئێریشان ژی ل سەر زەڤیێن پەترۆلێ ھاتبوون کرن، ئەو ژی زەڤیێن خورمەلە، کۆرمۆر، سەرسنک، ئەترووش، بای حەسەن، پێشخابوور، تاوکێ و ھونت ئۆل بوون. ئێریشێن دن ژی ل سەر ھێزێن ئەولەھیێ و بالافرخانەیان ھاتنە کرن.

شاندەکە پایەبلندا ئیراقێ ب سەرۆکاتیا شێورمەندێ ئەولەکاریا نەتەوەیی قاسم ئەعرەجی ل رۆژا دوشەمبێ 28ێ تیرمەھا 2025ێ، گھیشتبوو ھەولێرێ و ژ ئالیێ وەزیرێ ناڤخوەیێ حکوومەتا ھەرێما کوردستانێ رێبەر ئەحمەد ڤە پێشوازیا وێ شاندێ ھات کرن.