پارتیا وه‌لاتپارێزێن كوردستانێ: ئه‌م نێرینا ئۆجالان یا د ده‌ربارێ پرسا كوردی ده ب توندی ره‌د دكه‌ن
پارتییا وەلاتپارێزێن کوردستانێ (PWK)، ب بۆنەیا دویەمین سالڤەگەرا دامەزراندنا خوە، داخویانیەک بەرفرەهـ بەلاڤ کر و تێ دە هەم تێکۆشینا خوە یا دو سالان نرخاند، هەم ژی هەلوەستا خوە یا ل سەر رۆژەڤا سیاسی یا کوردستان و ترکیەیێ ئاشکەرا کر.
د داخویانیێ دە، PWK بال کشاند سەر دۆزا گرتنێ یا ل دژی وێ، نێرینێن خوە یێن ل سەر دیالۆگا ئۆجالان و دەولەتێ، شەرتێن ئاشتیەکە راستەقین و گرینگیا یەکیتیا نەتەوەیی.
ژ یەکیتیێ هەتا دۆزا گرتنێ: دو سالێن تێکۆشینێ
PWK، د 10ێ ئیلۆنا 2023یان دە ل ئامەدێ، وەکە ئەنجاما یەکبوونا پارتییا ئازادییا کوردستانێ (پاک) و تەڤگەرا دەمۆکراتیکا کوردستانێ (تدک-تەڤگەر) ب تەڤلێبوونا کەسایەتیێن سەربخوە، ب کۆنگرەیەکە یەکیتیێ هاتبوو دامەزراندن.
د داخویانیێ دە ئاماژە ب وێ هات کرن، چاوا پارتیا پێشەنگ پاک ژ بەر ناڤێ “کوردستان” و ئارمانجێن خوەیێن سیاسی د بن زەختێن دەولەتێ دە بوو، PWK ژی ژ رۆژا دامەزراندنا خوە ڤە ب هەمان زەختان رە روو ب روو مایە.
ل سەر داخوازا سەردۆزگەریا کۆمارێ، دادگەها دەستوورا بنگەهینا ترکیەیێ ژ PWKێ خوەست کو ناڤێ “کوردستان” و مادەیێن تێکلدار ژ بەرنامەیا خوە دەرخینە. لێبەلێ، پشتی کو PWK ئەڤ داخواز رەد کر و د پارێزنامەیا خوە یا ب کوردی و ترکی دە مافێن خوە پاراست، دادگەها دەستوورا بنگەهین دۆزا گرتنێ ل پارتیێ ڤەکر. هات دیارکرن کو ئەڤ پرۆسەیا دارازێ هینا ژی بەردەوام دکە.
هەلوەستا ل هەمبەری دیالۆگا دەولەت-ئۆجالان و پێڤاژۆیا چەکدانینێ
د داخویانیێ دە ب بەرفرەهی ل سەر “پرۆژەیا ترکیەیا بێتەرۆر” یا کو د ناڤبەرا دەولەتا ترک و ئابدوڵاهـ ئۆجالان دە ب ئاوایەکی نەدیار تێ مەشاندن، هات راوەستاندن. PWK دا زانین کو ئەو چەکدانینا په‌كه‌كێ د بەرژەوەندیا دۆزا گەلێ کورد دە دبینن و ئەڤ یەک دکارە “رێ ل بەر بەهانەیێن دەولەتا ترک تەنگ بکە و قادا خەباتێن سیاسی، دەمۆکراتیک و سڤیل فرەهتر بکە.”
لێبەلێ، پارتیێ هشیاری دا کو دڤێ ئەڤ یەک نەبە هنجەت ژ بۆ تەپساندنا داخوازێن نەتەوەیی.
PWK ب توندی نێزیکاتیا ئۆجالان یا کو پرسا کوردنە وەکە پرسا نەتەوەیەک بندەست و وەلاتەکی داگیرکری، لێ د چارچۆڤەیا “جڤاکا دەمۆکراتیک” دە پێناسە دکە، رەد کر.
هەروها د داخویانیێ دە هات گۆتن: “ئەم ب ئەشکەرە ل دژی ڤان نێرینێن ئابدوڵاهـ ئۆجالانن. وەکە هەر مللەتەکی، مافێ ملەتێ کورد ژی هەیە کو چارەنڤیسا خوە ب خوە دیار بکە.نە کەسەک،نە ژی پارتیەک نکارە ل سەر ناڤێ ملەتێ کورد دەڤ ژ مافێن بنگەهین و رەوا بەردە.”
شەرتێن ئاشتیەکە راستەقین و داخوازێن لەزگین
ل گۆری PWK، ژ بۆ ئاشتیەکە ب روومەت و چارەسەریەکە ماییندە، دڤێ دەولەتا ترک گاڤێن بەربچاڤ باڤێژە. PWK ئەڤ گاڤ ژی وها رێز کرن:
ناسنامە و زمان: دڤێ ناسنامەیا نەتەوەیی یا کورد و مافێ پەروەردەهیا ب زمانێ زکماکی د دەستوورا بنگەهین دە بێنە قەبوولکرن و کوردی ل گەل ترکی ببە زمانێ فەرمی.
ئازادی: دڤێ ئازادیا رامان و رێخستنبوونێ بێ مسۆگەر کرن و هەموو گرتیێن سیاسی بێنە ئازاد کرن.
ئالیێ دانووستاندنێ: ژ بۆ چارەسەریێ، دڤێ هەموو ئالیێن سیاسی، دەمۆکراتیک و سڤیلێن کورد وەکە موخاتاب بێنە دیتن و چارەنڤیسا گەلێ کورد ل پشت دەریێن گرتی و ب هەڤدیتنێن نەشەفاف نەیێ هشتن.
دڤێ دژمناتیا کوردان بقەدە: دڤێ ترکیە دەست ژ سیاسەتا خوە یا دژمناتیا کوردان ل پەرچەیێن دنێن کوردستانێ بەردە و رێزێ ل ستاتویا سیاسی یا ل باشوور و رۆژئاڤایێ کوردستانێ بگرە.
بانگا یەکیتی و هەڤکاریا نەتەوەیی
د داویا داخویانیێ دە، PWK تەکەزی ل سەر گرینگیا یەکرێزی و تفاقێن نەتەوەیی کر. هات دەستنیشانکرن کو چارەنڤیسا هەر چار پەرچەیێن کوردستانێ ب هەڤ ڤە گرێدایی یە و ژ بۆ ڤێ یەکێ پێویستی ب کۆئۆردیناسیۆنەکە نەتەوەیی هەیە. پارتیێ راگهاند کو ئەو ژ بۆ ئاڤاکرنا “پارتیەکە مللی، دەمۆکراتیک، گرسەیی و سیوانی” ئامادەنە و د ڤی واری دە چ بەرپرسیاری بکەڤە سەر ملێن وان، ئەوێ ب جهـ بینن.
PWK ب ڤان گۆتنان داوی ل داخویانیا خوە ئانی: “ئەم بانگی هەموو کادرۆیێن وەلاتپارێز، ئازادیخواز و کوردستانی دکن؛ وەرن ئەم ب هەڤ رە خوەدی ل ڤێ خەتا نەتەوەیی، دەمۆکراتیک و کوردستانی دەرکەڤن. هێڤی و سبەرۆژا مللەتێ کورد د ڤێ خەتێ دەیە. وەرن ئەم ب هەڤدوو رە ڤێ خەتا نەتەوەیی و کوردستانی خورتر، گەشتر و بەرفرەهتر بکن.”
