سەرۆک مەسعوود بارزانی ب هەلکەفتا 64ەمین سالڤەگەرا دەستپێکرنا شۆرەشا مەزنا ئیلۆنێ، پەیامەک بەلاڤ کر و تێ دە تەکەزی ل سەر گرینگیا دیرۆکی یا شۆرەشێ کر. سەرۆک بارزانی دیار کر کو شۆرەشا ئیلۆنێ رووپەلەکە زێرین د دیرۆکا تەڤگەرا رزگاریخوازا کوردستانێ دە یە.
سەرۆک بارزانی د پەیاما خوە دە، شۆرەشا ئیلۆنێ وەک “رووپەلەکە زێرین د تەڤگەرا رزگاریخوازا کوردستانێ دە” و “شۆرەشا هەری مەزنا سیاسی، چەکداری و جەماوەری یا سەرانسەری کوردستانێ” بناڤ کر. هەروها دەستنیشان کر کو ڤێ شۆرەشێ هشت کو دۆزا گەلێ کورد قۆناغێن مەزن دەرباس بکە و گەلێ کوردستانێ ب هێز و باوەریەکە مەزن بەر ب ئارمانجێن نوو ڤە پێنگاڤان باڤێژە.
سەرۆک بارزانی ئاماژە ب وێ یەکێ ژی کر، ئەڤ شۆرەش، ب رێبەرتیا بارزانیێ نەمر، جارا یەکەم د دیرۆکێ دە بنگەهەکە خورت ژ بۆ تێکۆشین و خەباتا هەڤبەشا هەموو هەرێم، چین و پێکهاتەیێن کوردستانێ دانی، دا کو ب هەڤرە پاراستنا دۆزا رەوا و مافێن گەلێ کوردستانێ بکن.
د بەشەکە دن یا پەیامێ دە هات گۆتن: “شۆرەشا ئیلۆنێ ژ بۆ قۆناغێن پاشەرۆژێ یێن خەباتا گەلێ کوردستانێ هەر تم بوویە چاڤکانیا هێز و ئیلهامێ و ئەزموون و دەستکەفتێن وێ شۆرەشا مەزن دێ هەر دەم رێیا خەبات و تێکۆشینا گەلێ کوردستانێ رۆنی بکن.”
د داویا پەیاما خوە دە، سەرۆک بارزانی سپاسی و پێزانینێن خوە پێشکێشی هەموو پێشمەرگە، کادرۆ و خەباتکارێن شۆرەشێ کر، یێن کو ب وێرەکی و وەستانا خوە دیرۆک و سەربلندی ژ بۆ گەلێ خوە تۆمار کرنە. هەروها هەزار سلاڤ ژ بۆ گیانێ پاکێ شەهیدێن شۆرەشا ئیلۆنێ و هەموو شەهیدێن ریا ئازادیا کوردستانێ شاند.
