ئەنجوومەنا نیشتیمانی یا کورد ل سووریەیێ (ئەنەکەسێ) د بەیاننامەیەکێ دە داخواز کر کو، ژ بۆ دیارکرنا ئاوایێ دەستھلاتداریا پاشەرۆژێ یا دەولەتا سووریەیێ و ژ بۆ چارەسەریەکا دادپەروەرانە و تەڤگر ژ بۆ پرسا کوردان دیالۆگەکا جدی لگەل حکوومەتا سووریەیێ بێ کرن.
ئەنەکەسێ د وێ بەیاننامەیێ دە “داخوازا ئالیکاری و ھەڤکاریێ د ناڤبەرا ھەمی پێکھاتەیێن گەلێ سووریەیێ دە” کر. ھەروەسا گۆت، “دڤێت ئەڤ خەباتا ھەڤپار ب ئاوایەکی بە کو، پێکانینا خوەستەکێن ھەر کەسی د دەولەتەکا دەمۆکراتیک یا پرئالی دە گارانتی بکە، کو ھەمی پێکھاتەیێن سووریەیێ ڤەگرە.”
د وێ بەیاننامەیێ دە ھەروەسا داخواز ھاتیە کرن کو، بالداری بکەڤە سەر قۆناغا ئاڤاکرنا دەولەتا نوویا سووریەیێ، کو پێدڤیتی ب تەڤلیبوونا چالاک و تەڤگرا ھەمی پێکھاتەیێن جڤاکا سووریەیێ ھەیە. ھەروەسا ئەنەکەسێ ئاماژە دایە رۆلا گەلێ کورد د پێشخستنا ژیانا سیاسی ل سووریەیێ دە، تەڤی وێ پاشگوھخستن و حاشاتیکرنا ژ مافێن وێ یێن نەتەوەیی تێ کرن.
ئەندامێ کۆمیتەیا تێکلیێن دەرڤە یا ئەنەکەسێ ئیبراھیم برۆ دوھی رۆژا شەمبی، 13ێ ئیلۆنا 2025ێ، راگهاند، “چ ئالیەکی ل رۆژئاڤایێ کوردستانێ داخوازا جودابوون و سەرخوەبوونێ نەکریە، د هەمان دەمێ دە نھا رەوشەکا جودا و ئەرێنی ژ بۆ کوردان ل سووریەیێ چێ بوویە. حکوومەتا سووریەیێ یا نھا دەرفەت دایە کوردان کو، ب رێیا دەستوور و دیالۆگێ مافێن خوە ب دەست بخن.”
سەرۆککۆمارێ سووریەیێ ئەحمەد شەرع و فەرماندارێ ھێزێن سووریەیا دەمۆکراتیک (ھەسەدێ) مەزلووم عەبدی ل رۆژا 10ێ ئادارا 2025ێ پەیمانەک ئیمزە کر، دا کو دەزگەھێن سڤیل و یێن لەشکەری یێن رۆژئاڤایێ کوردستانێ لگەل حکوومەتا سووریەیێ یا نوو بکن یەک.
