سەرۆکێ زیندانکری یێ پەکەکێ عەڤدللا ئۆجالان پەیامەک ژ سەرۆک عەشیر و رووسپیێن عەرەبێن ل رۆژئاڤایێ کوردستانێ رە شاند و تێ دە بانگا خوەدیدەرکەتنا ل خوشک و براتیا گەلێن کورد و عەرەب کر.
ئۆجالان د پەیاما خوە یا ژ شێخ و رووسپیێن عەشیرێن هەرێمێن جزیری، دێرازۆرێ، رەقایێ و تەبقایێ رە گۆت، “ئەز پشتگرێ خوشک-براتی و یەکتیا گەلێ کورد و عەرەبم، کو ئەو خوەدی بنگەھا دیرۆکییە.”
پەیاما ئۆجالان ژ بۆ عەشیران وھایە:
“ژ بۆ شێخ و رووسپیێن عەشیرێن ھەرێمێن جزیرێ، دێرازۆر، رەقایێ و تەبقایێ:
دۆستێن ھێژا:
دەستپێکێ ئەز ب کێفخوەشی، حەزکرن و رێزداری وە سلاڤ دکم.
یەکیتی و پشتگریا وە ژ بۆ کوردان ل سەر بنگەھا سیستەما نەتەوەیا دەمۆکراتیک خوەدی واتەیەکا مەزنە.
ھوون ب ڤێ یەکیتیێ بنگەھەکێ دیرۆکی یێ نوو یێ خوەدی باوەریا ب تێکلی و ھەڤبەندیا د ناڤبەرا گەلێن عەرەب و کورد دە ئاڤا دکن.
د دلێ دیرۆکێ دە، د ناڤبەرا ھەر دو گەلێن کورد و عەرەب دە تێکلی ھەنە. د کووراھیا دیرۆکێ دە ھەر تم دۆستانی و براتیا د ناڤبەرا گەلێن عەرەب و کورد دە ل پێش بوو. ھەتا ئەڤ دۆستانی، د دەما دەرکەتنا ئیسلامێ و بەلاڤبوونا وێ ب سەرکێشیا پێغەمبەر محەمەد دە، ھشت کو پرانی کورد ب ھێسانی تەڤ ل ئۆلا ئیسلامێ ببن. سەدەما سەرەکی، تێکلیێن خورتێن د ناڤبەرا ھەر دو گەلێن کورد و عەرەب دەیە. ئەڤ تێکلیێن خوشک-براتی یێن د ناڤبەرا ھەر دو گەلان دە پشتی ئیسلامێ ب چەند سەدسالان، دەوام کر و ب پێش کەت.
ئەڤ یەکیتیا کو ھوون ئیرۆ ب رێ ڤە دبن ژ ئالیەکی ڤە دیرۆکییە و ژ ئالیەکی دن ڤە ژی جڤاکییە. ھەر وھا خوەدی بنگەھا سیاسییە ژی، ژ لەورە ئەڤ ھەلوەست و یەکیتیا ل سووریەیێ خوەدی گرینگیەکا مەزنە و واتەیەک مەزن ددمێ. ئەز پشتگریێ ددم خوشک- براتی و ھەڤبەندیا گەلێن کورد و عەرەب، ژ بەر کو بنگەھا وێ یا دیرۆکی ھەیە.
ل سەر ڤێ بنگەھێ، مە خوە ب پێش خست و مە هەلوەست ل سەر بنگەھا خوشک-براتیێ و نەتەوەیا دەمۆکراتیک دانی. دڤێت گشتی وەکھەڤ بن، ئازاد بن، ب ھەڤ رە بژین، خوە ب خوە ب رێ ڤە ببن. دڤێت ل سەر ڤێ بنگەھێ وەکھەڤی و عەدالەت بێ ئاڤاکرن. دڤێت کورد و عەرەب ب ھەڤ رە بن. ئەڤ ژی ب پشتگریا وە ژ هەسەدێ ڤە گرێدایییە. پشتگریا وە ژ بۆ هەسەدێ خوەدی گرینگی و واتەیەک مەزنە.
دۆستێن ھێژا:
ھوون دکارن رۆلەکی گرینگ و دیرۆکی د ئاڤاکرنا سووریەیا دەمۆکراتیک، ئەولە، یەکگرتی و عادل دە بلیزن. گرینگە عەرەب، کورد، سوریان-ئاشووری و ھەر کەسێ ل سەر ڤێ خاکا پیرۆز ژ بۆ ڤێ براتیا دیرۆکی تەڤ بگەرن.
ئەز ب ڤێ ھێڤی و باوەریێ وە ھەمبێز دکم
جارەکا دن وە تەڤان ب رێزداری سلاڤ دکم
د ژیانا وە دە تەندورستی و سەرکەتنێ دخوازم
سلاڤێن دۆستانە و براتی
28/7/2025
عەبدوللا ئۆجالان
گرتیگەھا ئیمرالی.”
