شاندەکا پارێزەرێن ئۆجالان بەری دەمەکە کێم گھیشت گرتیگەھا ئیمرالیێ و دێ لگەل ئۆجالان کۆمبە.
ل گۆری نووچەیێن مەدیایا نێزیکی پەکەکێ، شاندا پارێزەرێن کو ئیرۆ دوشەمبێ، 15ێ ئیلۆنا 2025ێ چوویە ئیمرالیێ ژ جەنگز یورەکل، رازیە ئۆزتوورک و ئیبراھیم بیلمەز پێک تێ و سەردانا وان ژی گرێدایی ھەڤدیتن و دانووستاندنێن لگەل ئۆجالانی یە.
ل گۆری زانیاران، سەردان و دانووستاندنێن ئیرۆ یێن شاندا پارێزەران لگەل ئۆجالان دێ گرێدایی پێنگاڤێن پاشەرۆژێ یێن پێڤاژۆیا ئاشتیێ ل ترکیەیێ بە. ئەڤ ژی د دەمەکێ دەیە کو، کۆمیسیۆنا ئاشتیێ یا پارلەمەنتۆیا ترکیەیێ دێ ڤێ ھەفتەیێ دو جڤینێن گرینگ ل دار بخە.
جڤینا یەکێ دێ ل رۆژا چارشەمبێ لگەل ئاکادەمیسیەن و مامۆستایێن زانینگەھان بە، ل رۆژا پێنجشەمێ ژی دێ لگەل نوونەرێن رێخستنێن جڤاکا سڤیل بە. تەڤی کو ئەجێندا و کارنامەیێن جڤینان نەھاتنە ئەشکەرەکرن ژی، لێ دیسا ژی دێ ھەر گرێدایی پێڤاژۆیا ئاشتیێ ل ترکیەیێ بە.
پێشتر ژی ھەردو پارێزەر رێزان ساریجا و نەڤروز ئویسال ئاسلان ل رۆژا 7ێ تەباخا ئیسال سەردانا ئیمرالیێ کربوو و لگەل ئۆجالان جڤیابوون.
