رۆژنامەڤانێ ترک سەدات بۆزکورت راگهاند، رێبەرێ په‌كه‌كێ عه‌بدوللا ئۆجالان، کو ل گرتیگەها ئیمرالیێ گرتییە، ئامادەکاریا دامەزراندنا پارتیەکە نوو یا سیاسی دکە کو دێ ناڤێ “ترکیە” ژی تێ دە هەبە.
رۆژنامەڤانێ ترک سەدات بۆزکورت دوهـ 14ێ ئیلۆنێ راگهاند، ئۆجالان ب خوە بەرنامەیا پارتیێ دنڤیسە و دێ ئەنداما شاندا ئیمرالیێ و پەروین بولدان وەک سەرۆکا پارتیێ دەستنیشان بکە. د هەمان دەمێ دە، ئەو رۆژنامەڤان پێشبینی دکە کو پارتیا وەکهەڤی و دەمۆکراسیێ یا گەلان (دەم پارتی) وەرە گرتن، لێ هه‌ده‌په دێ نەیێ گرتن.
هەروها، د چارچۆڤەیا ڤان گوهەرتنان دە، ئەگەرا بەردانا هەڤسەرۆکێ گشتی یێ بەرێ یێ هه‌ده‌پێ سه‌لاحه‌ددین دەمیرتاش ژی تێ زمان. تێ گۆتن کو ئەڤ گاڤ دێ سیاسەتا باکورێ کوردستانێ بەر ب قۆناغەکە نوو ڤە ببە.
هەتا نها، دەربارێ ڤان ئیدیعایان دە، نە ژ ئالیێ کەسێن نێزیکی ئۆجالان و نه ژی ژ ئالیێ بەرپرسێن دەم پارتیێ ڤە ت داخویانی یان ژی پشتراستکرنەکە فەرمی نەهاتیە دایین.
عه‌بدوللا ئۆجالان د 4ێ نیسانا 1948ان دە ل رهایێ ژ دایک بوویە و د سالا 1978ان دە پارتیا کارکەرێن کوردستانێ (په‌كه‌كه) دامەزراند. ئەو د 15ێ سباتا 1999ان دە ل کەنیایێ هات گرتن و هەتا نها ل گرتیگەها ئیمرالیێ گرتییە.
ل سەر بانگا ئۆجالان، په‌كه‌كێ د 12ێ گولانا 2025ان دە، پشتی 12ەمین کۆنگرەیا خوە راگهاندبوو، وێ بریارا بەلاڤکرنا هەموو ئاڤانیا خوە یا رێخستنی و داویئانینا ل تێکۆشینا چەکداری دایە.
پارتیا کارکەرێن کوردستانێ (په‌كه‌كه) رۆژا 12ێ گولانا 2025ان ئەنجامێن کۆنگرەیا خوە یا 12ەمین ئەشکەرە کر و گۆت، په‌كه‌كێ بریار دایە کو ئاڤانیا خوە یا رێخستنی هلوەشینە و تێکۆشینا چەکداری و هەموو چالاکیێن کو ل سەر ناڤێ رێخستنێ تێنە کرن ب داوی بکە.
