پارتیا دەمۆکراتا کورد ل سووریەیێ (پەدەکەسە) تەکەز دکە، ھەر دیالۆگەکا د ناڤبەرا تەڤگەرا سیاسی یا کورد و حکوومەتا شامێ دە، ھەتا کو چارەنڤیسا عەفرین، سەرێ کانیێ و گرێ سپی نەکەڤە رۆژەڤا سەرەکی، دێ کێم و بێواتە بمینە.
پەدەکەسێ د داخویانیا خوە دە دەستنیشان کر، ئەڤ باژار نە تەنێ ھاتنە داگیرکرن، بەلکی راستی یەک ژ بەرفرەھترین ئۆپەراسیۆنێن گوھەرتنا دەمۆگرافیک و کۆچبەرکرنا ب زۆرێ د دیرۆکا سووریەیێ یا نووژەن دە ھاتنە.
ھەروھا بال کشاند سەر رەوشا تراژیکا خەلکێ ھەرێمێ و گۆت: “زارۆکێن ڤان ھەرێمان ئیرۆ ل کامپێن ل ھەرێمێن رەقا، حەسەکێ و قامشلۆ یان ژی ل وەلاتێن جیران دژین، د دەمەکێ دە کو نشتەجھێن کوردێن رەسەن ھاتنە کۆچبەرکرن و ل شوونا وان نشتەجھێن عەرەب ھاتنە ئانین، و ئاخ و ناسنامە بوونە رەھین د دەستێ داگیرکەریێ دە.”
ل گۆری پەدەکەسێ، ڤەگەرا عەفرین، سەرێ کانیێ و گرێ سپی بۆ خەلکێ وان یێ رەسەن، نە تەنێ مژارەکا ئەردنیگارییە، لێ بەلێ “پرسگرێکا ماف، ھەبوون و ناسنامەیێ”یە. د داخویانیێ دە ھات گۆتن: “ئەڤ ڤەگەر، پیڤانا راستبوونا ھەر پەیمانەکا سیاسی یا پێشەرۆژێیە و د ھەمان دەمێ دە تاقیکرنەکا جدییە ژ بۆ پابەندبوونا ب درووشما ‘سووریەیەکە فەدەرال، پرئالی و دەمۆکراتیک’.”
داخویانیێ ئاماژە ب وێ یەکێ ژی کر، دبە ھندەک ئالی ھەول بدن ڤی دۆسیایێ ب بەهانەیا “ھەڤسەنگیێن ھەرێمی” یان “لھەڤکرنێن ناڤدەولەتی” بپاش بخن، لێ ئەزموونان سەلماندیە کو پرسگرێکێن گەلان ب پاشگوھخستنێ چارەسەر نابن و ماف لگەل دەمی وندا نابن.
د داویا داخویانیێ دە، پەدەکەسێ ئەشکەرە کر کو عەفرین، سەرێ کانیێ و گرێ سپی “برینەکا ڤەکری نە د لاشێ کورد و سووریەیێ دە”، لێ تەڤی ڤێ یەکێ ژی، ئەڤ مژار ھەتا نھا راستەراست نە ل سەر میزێن دانووستاندنانە. ھات گۆتن کو دیالۆگا ھەیی یا د ناڤبەرا ھێزێن سیاسی یێن کورد و شامێ دە زێدەتر ل سەر مژارێن دەستووری و ئەولەھیێ یێن ھەرێمێن رێڤەبەریا خوەسەر دسەکنە، لێ دۆسیەیا ھەرێمێن داگیرکری گرێدایی ھەڤسەنگیێن ھەرێمی و ناڤدەولەتی ھاتیە ھشتن.
