پارتیا وەلاتپارێزێن کوردستانێ ب بۆنەیا 33مین سالڤەگەرا تەرۆرکرنا سکرتێرێ گشتییێ «پدک-ئیرانێ» د. سادق شەرەفکەندی و هەڤالێن وی پەیامەک بەلاڤ کر و تێدا دەولەتا ئیرانێ ژ بەر ڤێ «كۆمكوژییا سیاسی» شەرمەزار کر و دا زانین کو ب کوشتنا رێبەران رێ ل بەر دۆزا ئازادیێ یا گەلێ کورد نایێ گرتن.
پەیاما بورۆیا راگەهاندنێ یا پارتیا وه‌لاتپارێزێن كوردستانێ:
سکرتێرێ گشتییێ «پدک-ئیرانێ» د. سادق شەرەفکەندی، د 17یێ ئیلۆنا سالا 1992ان دە، ل باژارێ بەرلینێ، ل وەلاتێ ئالمانیایێ، ل گەل ئەندامێ کۆمیتەیا ناڤەندی و نوونەرێ دەرڤەی وه‌لات یێ «پدک-ئیرانێ» فەتاح عەبدولی، نوونەرێ پارتیێ یێ ئالمانیایێ هۆمایوون ئەردەلان و دۆستێ «پدک-ئیرانێ» نووری دێهکوردی، ب ئەمرێ دەولەتا ئیرانێ، ژ ئالیێ سیخۆرێن دەولەتا ئیرانێ ڤە هاتن قەتل کرن.
ئەم دەولەتا ئیرانێ جارەکە دن ژی ژ بەر ڤێ كۆمكوژییا سیاسی روورەش و شەرمەزار دکن.
دەولەتا ئیرانێ ب سێداره‌دانا پێشەوا قازی محەمەد و هەڤالێن وی، ب قەتلکرنا د. عه‌بدولره‌حمان قاسملۆ و هەڤالێن وی، ب قەتل کرنا د. سادق شەرفەکەندی و هەڤالێن وی ژی نکاریبوو رێ ل بەر دۆزا ئازادییا گەلێ مەیێ رۆژهلاتێ کوردستانێ بگرە.
ئەو ئالایا کو د راگهاندنا کۆمارا مەهابادێ دە، ل مەیدانا چارچرایێ هاتبوو هلدان، ئیرۆ ل رۆژهلاتێ کوردستانێ و ل هەر پارچه‌یه‌كا کوردستانێ ب دەستێ خەباتکار، کەدکار و تێکۆشەرێن دۆزا ئازادییا کوردستانێ ل با دبە.
د 33یەمین سالڤەگەرا شەهادەتا وان پاکرەوانان دە، ئەم د. سادق شەرەفکەندی و هەڤالێن وی و هەموو شەهیدێن کوردستانێ ب رێزداری ب بیر تینن.
