دو کەچێن جوانێن کورد، یەک ژ وان خوەدی ناسنامەیا ئەلمانی، ل سەر رێیا دێر حافرێ ژ ئالیێ گرووپێن چەکدار یێن گرێدایی ترکیەیێ ڤە ھاتن رەڤاندن. ھات زانین کو یەک ژ وان ل عەفرینێ دیل تێ گرتن و ژ بۆ بەردانا وێ 150 ھەزار یورۆ فیدیە تێ خوەستن، لێ چارەنووسا کەچا دن ھەتا نھا نە دیارە.
بوویەر د 13ێ ئیلۆنا 2025ێ دە ل سەر رێیا حەلەب-قامشلۆ، ل نێزیکی باژارۆکێ دێر حافرێ قەومی. ھەیفا عادل تەیار (25 سالی) یا ژ ھەرێما کۆبانیێ و نۆرمان جەلال سەرحان (30 سالی) یا ژ دێرکێ، کو د ھەمان دەمێ دە وەلاتیا ئالمانیایێ یە، ژ ئالیێ چەکداران ڤە ھاتن رەڤاندن.
جھێ نۆرمانێ ل عەفرینێ ھاتە ئەشکەرەکرن
ل گۆری ئاگاھیێن کو ژ ئالیێ چالاکڤانان ڤە ھاتنە بەلاڤکرن، نۆرمان سەرحان نھا ل ھەرێما شیێ یا عەفرینێ، د دەستێ چەکدارێن گرووپا ب ناڤێ “ئەمشات” دە دیل تێ گرتن. ھات راگھاندن کو رەڤاندیان ژ بۆ بەردانا وێ داخوازا فیدیەیەکە ب قاسی 150 ھەزار یورۆیان کرنە.
مالباتا نۆرمان پشتراست کر، زەختا مەدیایێ و رایا گشتی ئالیکار بوویە د ئەشکەرەکرنا جیێ کەچا وان دە. لێ بەلێ، مالبات راستی گەفان ھاتیە و ب دەرەوینی ب ئەندامتیا “ھەسەدێ” ھاتنە تۆمەتبارکرن.
ھەیا نھا ت ئاگاھی دەربارێ چارەنووسا ھەیفا عادل تەیار دە نینە و مالباتا وێ د ناڤا نیگەرانیێن مەزن دەیە.
رێخستنێن مافێن مرۆڤان ترکیەیێ بەرپرس دبینن
بوویەر بوو سەدەما بەرتەکێن توندێن رێخستنێن مافێن مرۆڤان. رێخستنا مافێن مرۆڤان ل عەفرینێ د داخویانیەکێ دە ملیسێن وەکی “ھێزا ھەڤبەشا ئەمشات و ھەمزات” و “سولتان موراد” وەک بەرپرسیارێن رەڤاندنێ ب ناڤ کر. رێخستنێ ترکیە وەک ھێزا داگیرکەر ژ ئەولەھیا ھەرێمێ بەرپرس دیت و بانگ ل سازیێن ناڤدەولەتی کر کو زەختێ ل ترکیەیێ بکن.
ھەروھا، رێخستنا مافێن مرۆڤان یا ئالمانیایێ ژی داخویانیەک بەلاڤ کر و ب تایبەتی بال کشاند سەر نۆرمان سەرحان کو وەلاتیا ئالمانیایێ یە. رێخستنێ بانگ ل دەستھلاتدارێن سووریەیێ کر کو دەملدەست دەستێوەردانێ بکن و ھشیاری دا کو ھەگەر بەرسڤەک نەیێ دایین، ئەو دێ دۆزێ بگھینن ئاستا ناڤدەولەتی و سەری ل حکوومەتا فەدەرال یا ئەلمانیایێ و دادگەھێن ناڤدەولەتی بدن.
