شاندەیەکە پارتیا سۆسیالیستا کوردستانێ (په‌سه‌كێ) ب سەرۆکاتیا سەرۆکێ گشتی بایرام بۆزیەل، سەردانا ناڤەندا گشتی یا پارتیا وەکهەڤی و دەمۆکراسیێ یا گەلان (دەم پارتی) ل ئەنقەرەیێ کر.
شاندە ژ ئالیێ هەڤسەرۆکێ گشتییێ دەم پارتیێ تونجەر باکرهان و رێڤەبەرێن پارتیێ ڤە هات پێشوازیکرن و د جڤینێ دە چارەسەریا پرسا کورد و ئەگەرا دەستوورەکە نوو یا بنگەهین هاتن گۆتووبێژکرن.
ل گۆری داخویانیا بورۆیا چاپەمەنیێ یا په‌سه‌كێ، د هەڤدیتنێ دە کو دوهـ 17ێ ئیلۆنێ هاتبوو کرن، ل سەر چارەسەریا پرسا کورد، رەوشا ل رۆژئاڤایێ کوردستانێ، پێڤاژۆیا سیاسی یا ل ترکیەیێ و گەشەدانێن هەرێمی دانووستاندنا نێرینان هاتیە کرن. ب تایبەتی، ل سەر ئەگەرا ئامادەکرنا دەستوورەکە نوو یا بنگەهین کو مافێن بنگەهینێن گەلێ کورد د ناڤ خوە دە بهەوینە، نرخاندن هاتن کرن.
د سەردانێ دە، سەرۆکێ گشتییێ په‌سه‌كێ بایرام بۆزیەل، راپۆرەکە کو پارتیا وان ئامادە کریە و تێ دە نێرینێن وانێن ژ بۆ چارەسەریێ هەنە، پێشکێشی رایەدارێن دەم پارتیێ کر. راپۆر ب سەرناڤێ “چارەسەرکرنا پرسا کورد ب رێبازەکە سیاسی و وەکهەڤیخواز پێکانە” بوو.
شاندەیا په‌سه‌كێ ژ سەرۆکێ گشتی بایرام بۆزیەل، ئەندامێن دەستەیا رێڤەبەرا ناڤەندی هاسان داگتەکین و جەلال یلدز، و ئەندامێن مەجلسا پارتیێ ئالائاددین ئاراس و هایدار جیهانەر پێک دهات.
په‌سه‌كێ دا زانین کو سەردانێن وانێن ژ بۆ گۆتووبێژکرنا چارەسەریا پرسا کورد دێ د رۆژێن پێش دە ژ بۆ پارتیێن سیاسی و سازیێن جڤاکا سڤیل بدۆمن.
