کۆمیتەیا وەزیرێن ئەنجوومەنا ئەورۆپایێ داخوازا ئازادکرنا دەمیرتاش کر، هەروەسا ژ ترکیەیێ ژی خوەست کو هەتا خزیرانا 2026ێ ل سەر دایینا مافێ هێڤیێ ب ئۆجالان ژی هایداریان بدە وان.
کۆمیتەیا وەزیرێن ئەنجوومەنا ئەورۆپایێ د جڤینا خوە یا ئاسایی دە تێکۆشینا سه‌لاحه‌ددین دەمیرتاش بلند نرخاند و ئاماژە دا کو، دەمیرتاش و سیاسەتمەدارێن دن یێن ژ ئالیێ گەل ڤە هاتنە هلبژارتن ژ بەر سەدەمێن سیاسی بێی تو دەلیلەک هاتنە گرتن.
کۆمیتەیا وەزیرێن ئەنجوومەنا ئەورۆپایێ دادگەها دەستووری یا ترکیەیێ رەخنە کر ژ بەر کو تو لێکۆلینەک ل سەر سەردانا دەمیرتاش نەکریە. وێ کۆمیتەیێ هەروەسا داخواز ژ ترکیەیێ کر کو، یەکسەر داخوازا ئەورۆپایێ بجیهـ بینە و دەمیرتاش و سیاسەتمەدارێن دن ئازاد بکە.
کۆمیتەیا ناڤبری ل سەر دایینا مافێ هێڤیێ ب عه‌بدوللا ئۆجالان ژی داخواز ژ ترکیەیێ کر کو، هەتا خزیرانا 2026ێ هایداریان بدە ئەنجوومەنا ئەورۆپایێ.
مافێ هێڤیێ قانوونەک ئان مافەکە کو، ژ ئالیێ دادگەها مافێن مرۆڤان یا ئەورۆپایێ ڤە هاتیە دەرخستن. ل گۆری ڤێ قانوونێ، هەر گرتیەک کو جەزایێ گرتنا هەتا هەتایێ لێ هاتیە برین، پشتی 25 سالان ژ گرتنێ، دێ مافێ وی هەبە کو ژ بۆ نرخاندنا جەزایێ خوە ئیتیراز بکە، ئان بێ ئازادکرن ئان ژی ب شەرت بێ بەردان.
