سەرۆکوەزیرێ ھەرێما کوردستانێ مەسروور بارزانی، ئیرۆ 20ێ ئیلۆنێ پرۆژەیا ستراتەژیکا رێیا دوئالی یا شێخان-لالشێ ل پارێزگەھا دھۆکێ ڤەکر.
سەرۆکوەزیر مەسروور بارزانی د مەراسیما ڤەکرنا رێ دە، گۆتارەک پێشکێش کر و تەکەزی ل سەر ئانینە جھا سۆزان، گرینگیا جڤاکا ئێزدی، و دانووستاندنێن لگەل بەغدایێ کر و مزگینیا رێکەفتنەکا نوو دەربارێ مووچەیان دە دا.
“مە سۆزا خوە ئانی جھ”
سەرۆکوەزیر بارزانی د دەستپێکا ئاخافتنا خوە دە گۆت: “سالەک بەرێ ئەم ل ڤر بوون و مە سۆز دا وە کو ئەم دێ رێیا شێخانێ یا بەر ب لالەشا پیرۆز ڤە بکن دوساید. سپاس ژ بۆ خوەدێ، پشتی سالەکێ ئەم ڤەگەریان و ئیرۆ ژ بۆ ڤەکرنا ڤێ رێیێ ئەم ل ڤرن.”
“ئێزدی کوردێن رەسەنن”
دەربارێ پێگەھا جڤاکا ئێزدی دە، سەرۆکوەزیر تەکەز کر: “خوشک و برایێن ئێزدی بەشەکێ رەسەن یێ کوردستانێ نە و وەکە کو جەنابێ سەرۆک بارزانی گۆتیە، ئێزدی کوردێن رەسەنن. ژ بەر ڤێ یەکێ، ئەم ب چ ئاوایی ژ ھەڤ جودا نابن.”
“بلا ھێزێن نەیاسایی ژ شنگالێ دەرکەڤن”
مەسروور بارزانی بال کشاند سەر رەوشا شنگالێ و گۆت: “گەلەک ھەول تێن دایین کو خوشک و برایێن مەیێن ئێزدی ژ شنگالێ بێن دوورخستن. مە گەلەک ھەول دا کو رێکەفتنا شنگالێ لگەل حکوومەتا فەدەرالی بهێتە جیبجیکرن، لێ ھەتا نھا نەھاتیە کرن، ژ بەر کو ھندەک ھێزێن نەیاسایی ل باژێر ھەنە. ئەم بانگ ل حکوومەتا ئیراقێ دکن کو پێنگاڤێن پێویست باڤێژە و ئاسانکاریان بکە دا کو خوشک و برایێن مەیێن ئێزدی ب سەربلندی ڤەگەرن شنگالێ و جھێن خوەیێن دن.”
مزگینیا رێکەفتنێ ل سەر مووچەیان
د مژارا بوودجە و مووچەیان دە، سەرۆکوەزیر مەسروور بارزانی مزگینیەک دا و گۆت: “دانووستاندنێن مە لگەل حکوومەتا فەدەرالی بەردەوامن. وەکە حکوومەتا ھەرێما کوردستانێ، مە چ جاران ئاستەنگی چێنەکرنە و ھەموو پابەندیێن خوە ئانینە جھ. وەکە کو ئەز ھاتمە ئاگاھدارکرن، د دانووستاندنێن داوی دە، رێکەفتنەک د ناڤبەرا کۆمپانیێن بەرھەمھینەرێن پەترۆلێ یێن ل ھەرێما کوردستانێ و حکوومەتا فەدەرالی دە ھاتیە کرن. ئەڤە دەرفەتەکا پر باشە ژ بۆ نەھیشتنا ئاستەنگیان.”
سەرۆکوەزیر ھێڤیا خوە ئانی زمان، د رۆژێن پێش دە ئەڤ رێکەفتن ببە راستی و گۆت: “ئەم ھێڤیدارین حکوومەتا فەدەرالی ژی پابەندیێن خوە ژ بۆ دایینا مافێن دارایی یێن ھەرێما کوردستانێ جیبجی بکە و ئێدی پرسا مووچەیان نەبە مانشەتا نووچەیان.”
سەرۆکوەزیر مەسروور بارزانی ھەروھا دەستنیشان کر، تەڤی ھەموو کریزان ژی، ب سایا باوەریا سەکتۆرا تایبەت ب حکوومەتێ، وان د جیبجیکرنا پرۆژەیان و خزمەتکرنا وەلاتیان دە بەردەوام کرنە.
