بریارا رێڤەبەریا عەفرینێ ژ بۆ ڤەگەراندنا ملکان، نەرازیبوونێن توند ل پشت خوە ئانین

رێڤەبەریا ھەرێما عەفرینێ، گشتاندنەکا نوو ب ھەژمار (6/ت) د 18ێ ئیلۆنا 2025ێ دە دەرخست، تێ دە رێبازێن “ڤەگەراندنا ملکان” ژ بۆ وەلاتیان دیار دکە. لێ بەلێ، رێخستنا مافێن مرۆڤان ل عەفرینێ ب داخویانیەکێ ئەڤ بریار و گشتاندنێن دن وەکە “ھەولدانەک ژ بۆ تێکبرنا خەلکێ رەسەنێ کورد” ب ناڤ کر.

ناڤەرۆکا گشتاندنا فەرمی

ل گۆری گشتاندنا کو د بن چاڤدێریا کۆمیتەیا ئابۆری یا ل باکورێ سووریەیێ دە ھاتیە وەشاندن، پێڤاژۆیا ڤەگەراندنا ملکان وھا ھاتیە دەستنیشانکرن:

1- وەلاتیێن کو دخوازن ملکێن خوە ڤەگەرینن، دڤێت ب رێیا پارێزەرێن دەستنیشانکری بەلگەیێن خوەیێن ملکیاریێ سەرەراست بکن و ب فەرمی بدن تۆمارکرن.

2- پشتی ڤێ قۆناغێ، دڤێت بەلگەیێن پەسەندکری رادەستی نڤیسگەھا شاخێ یا کۆمیتەیا ئابۆری بکن.

3- نڤیسگەھا شاخێ بەلگەیان پەسەند دکە و ژ بۆ پەژراندنا داوی دشینە نڤیسگەھا ناڤەندی یا کۆمیتەیێ.

4- د داویێ دە، ملک ب ئاوایەکی فەرمی و ل گۆری قەیدێن تۆمارکری رادەستی خوەدیێ وێ تێ کرن.

د گەشتنامەیێ دە ناڤ و ھەژمارێن تەلەفۆنێ یێن پارێزەرێن دەستنیشانکری ژ بۆ ناڤچەیێن وەکە راجۆ، بلبلێ، جندرێسێ، شەرا، شیێ و ناڤەندا باژارێ ئەفرینێ ھاتنە بەلاڤکرن.

رێخستنا مافێن مرۆڤان: “ئەڤ گشتاندنە ئاستەنگکەرن”

ل ھەمبەرێ، رێخستنا مافێن مرۆڤان ل عەفرینێ ب داخویانیەکێ نەرازیبوونا خوە یا توند نیشان دا و راگھاند، ئەڤ گەشتنامە و دو گەشتنامەیێن دن یێن دەربارێ دەمسالا زەیتوونان دە، ب ئارمانجا زێدەکرنا بار و ئاستەنگیان ل سەر وەلاتیێن کورد ھاتنە دەرخستن.

د داخویانیا رێخستنێ دە ھاتیە گۆتن: “ئەڤ بریارێن ئاوارتەیێن وەکە گشتاندنا ھەژمار 6، پێڤاژۆیا ڤەگەراندنا ملکان تەڤلیھەڤ و زەحمەت دکن و بارێن دارایی و یاسایی ل سەر وەلاتیان زێدە دکن، نەمازە د رەوشا ئابۆری یا دژوار و گەندەلیا بەربەلاڤ دە.”

رێخستنێ ھەروھا ئاماژە ب وێ یەکێ کر کو کۆمیتەیا ئابۆری یا ب سەرۆکاتیا عەبدولباقی ئەل-خەتیب، بەردەوامیا ھەمان نڤیسگەھێن ئابۆری یێن بەرێ یێن گرێدایی کۆمێن چەکدارە، و ئەندامێن نھا یێن کۆمیتەیێ، “ھەمان کەسن کو بەرێ بەرپرسیارێ دەستەسەرکرن، تالانکرن و دزینا ملکێن خەلکێ رەسەنێ کورد بوون.”

د داویا داخویانیێ دە، رێخستنێ تەکەز کر کو ئەڤ گەشتنامە رێ ل بەر ڤەگەرا وەلاتیێن کورد دگرن و پێڤاژۆیا ڤەگەراندنا ملکان ئاستەنگ دکن، نەمازە د رەوشا ئاژاوە و بێەولەھیا سیستەماتیک دە کو ل ھەرێمێ د بن چاڤدێریا راستەراستا ئیستخباراتا ترکی دە سەردەستە.