د سالڤەگەرا کوشتنا نڤیسکار و رۆژنامەگەر مووسا عەنتەر دە ل دیاربەکرێ بەرنامەیەک بیرئانینێ ھات ل دارخستن و بەشداران قەرنەفیل دانین جھێ مووسا عەنتەر لێ ھاتی کوشتن. سیاسەتمەدار، رۆژنامەگەر و ئەندامێن مالباتا مووسا عەنتەر ئاماژە کرن کو مووسا عەنتەر نەتەوەپەروەرەکێ ھێژایێ کورد بوو و خزمەتەک گرینگ دایە چاند و زمانێ کوردی.
بەریا 33 سالان د 20ێ ئیلۆنا 1992ێ دە نڤیسکار و رۆژنامەگەرێ کورد مووسا عەنتەر ل دیاربەکرێ د ئێریشەکا چەکداری دە د تەمەنێ خوەیێ 72 سالیێ دە ژیانا خوە ژ دەست دا. د سالڤەگەرا کوشتنا مووسا عەنتەر دە ل کۆلانا کو لێ ھاتبوو کوشتن بەرنامەیەک بیرئانینێ ھات لدار خستن و رۆژنامەگەر، سیاسەتمەدار، ھەڤشدارەدار و ئەندامێن مالباتا مووسا عەنتەر بەشداری بیرئانینێ بوون و ئاماژە کرن کو مووسا عەنتەر ھەتا داویا ژیانا خوە ژی دۆزا نەتەوەیی مەشاند و کەد و خزمەتا وی یا بۆ چاند و زمانێ کوردی ھێژایە.
کورێ مووسا عەنتەر، دیجلە عەنتەر گۆت: “پشتی سەرھلدانا ئاگریێ یا 1938ێ ل سەر چیایێ ئاگری ھاتبوو نڤیسین کو “کوردستان مریە و د بن ڤێ ئاخێ دەیە” عیسا بابێ من و ھەڤالێن وی ئەو ئاخ ژ سەر وێ گۆرێ راکرن. نھا ھین ژی رامانێن وی دۆزا وی زندی نە.”
بەشدارێن چالاکیا بیرئانینا مووسا عەنتەر قەرنەفیل دانین جھێ کو مووسا عەنتەر لێ ھاتبوو کوشتن و سیاسەتمەداران ژی بال کێشاندن کو مووسا عەنتەر ب ھەلوەست و خەباتێن خوەیێن نەتەوەیی کاریە د ناڤا کوردان دە ببە رەمزەک نەتەوەیی.
پارلەمەنتەرێ دەم پارتییێ دیاربەکرێ محەمەد کاماچ گۆت: “وەک رەوشەنبیرەکی، وەک نڤیسکارەکی، وەک رۆژنامەگەرەکی ئاپێ مووسا کەسیەتەک گرینگ بوو و د ناڤا جڤاکێ دە مرۆڤەک بباندۆر بوو و ژ بەر وێ ژی دژمن ژی ب ڤێ باندۆرا وی باش دزانین ژ بەر وێ ئەو ھات قەتلکرن.”
