کۆمێن گرێدایی حکوومەتا شامێ ئێریشی گوندەکی دێر حافرێ ل رۆژھلاتێ حەلەبێ کر و د ئەنجامێ دە 7 کەس ھاتن کوشتن و ھەژمارەک ژی بریندار بوون.
ناڤەندا راگھاندنێ یا ھێزێن سووریا دەمۆکراتیک (ھەسەدێ) د داخویانیەکێ دە بەلاڤ کر، کۆمێن گرێدایی حکوومەتا شامێ یێن کو ژ ئالیێ ترکیەیێ ڤە تێن پشتگریکرن، ئیرۆ 20ی ئیلۆنێ دانێ ئێڤارێ ل گوندێ ئوم تینا یێ گوندەوارێ دێر حافرێ کۆمکوژیەکا ھۆڤانە ل دژی سڤیلان پێک ئانین.
دیار کر ژی، ئێریش دەمژمێر حەفتێ ئێڤارێ دەست پێ کرن، پێشی ب درۆنان ھاتن کرن و پشترە ژی ب تۆپبارانکرنەکا گران ھاتن بەردەوامکرن، کو راستەراست مالێن وەلاتیان کرن ئارمانج.
ل گۆری ناڤەندا راگھاندنێ یا ھەسەدێ، د ئەنجاما ڤان ئێریشێن ھۆڤانە دە، 7 سڤیلێن بێگونەھ شەھید بوون و 4 کەسێن دن ژی بریندار بوون.
ناڤێن شەھیدان:
– ئەمینە محەمەد ئەل-عەزاوی (75 سالی)
– فاتما ھەیە عوبێد (65 سالی)
– ئەمینە محەمەد ئەل-ھەمزە (22 سالی)
– عایشە ھەمزە عوبێد (18 سالی)
– ھەمزە عوبێد ئەل-رەززاق (4 سالی)
– عەبدولغەنی رەحمان ئەل-عوبێد (1 سالی)
– رەحەف حوسێن ئەل-عەزاوی (23 سالی)
ناڤێن برینداران:
– جومعا حەموود ئەل-موحاییسین (60 سالی)
– مەریەم حەموود ئەل-موحاییسین (55 سالی)
– حەلیمە مەحموود ئەل-موحاییسین (65 سالی)
– ئەمینە حەموود ئەل-ئەموورا (20 سالی)
ناڤەندا راگھاندنێ یا ھەسەدێ د داخویانیا خوە دە، ئەڤ تاوانا ھۆڤانە ب توندی شەرمەزار کر و گۆت: “ئەم ب توندی ڤێ تاوانا نەفرەت شەرمەزار دکن، کو د چارچۆڤەیا نێزیکاتیا بەردەواما ڤان کۆمان دەیە کو ئەڤ چەند سالن سڤیلێن بێچەک دکن ئارمانج. ئەم تەکەز دکن کو بێسزابوونێ جەسارەت دایە دوبارەکرنا ڤان بنپێکرنان.”
