هه‌سه‌ده: ژ پشتی کەتنا رژێما ئەسەد ڤە داعشێ 153 ئێریش کرنە
فەرمانداریا گشتی یا هێزێن سووریەیا دەمۆکراتیک (هه‌سه‌دێ) راگهاند کو، خەتەریێن داعشێ ل رۆژئاڤایێ کوردستانێ بەردەوامن. ئاماژە ژی دا کو، ژ پشتی کەتنا رژێما بەشار ئەسەد ڤە بەردەوام چالاکیێن چەکداری دکن.
هه‌سه‌دێ د راگهاندنەکێ دە ئەشکەرە کر، ژ دەستپێکا شەرێ ناڤخوەیی یێ سووریەیێ ل سالا 2011ێ ڤە، داعشێ ژ رەوشا وی وەلاتی فەیدە وەرگرتیە دا کو هەبوونا خوە بسەلمینە و خەتەریێ ل سەر گەلان چێ بکە، د دوو رە ژی ب هه‌سه‌دێ و هەڤپەیمانیا ناڤنەتەوەیی رە شەر کریە و ژ دەڤەرێن کۆبانی، رەقە و باغۆزێ هاتیە دەرخستن.
د وێ راگهاندنێ دە هاتیە، ژ پشتی هلوەشینا رژێما ئەسەد ل رۆژا 08.12.2024ێ ڤە، شانەیێن داعشێ 153 ئێریش کرنە سه‌ر رۆژئاڤایێ کوردستانێ، کو ئەڤ ژی ئاماژەیێ ددە بزاڤێن وێ ژ بۆ ژ نوو ڤە رێخستنکرنا رێزێن وێ و بەرفرەهکرنا ئێریشێن وێ.
هه‌سه‌دێ ئەشکەرە ژی کر، د دەما 10 مەهێن بۆری دە، هێزێن مە ب پشتگریا هەڤپەیمانیا ناڤنەتەوەیی 70 ئۆپەراسیۆنێن لەشکەری و ئەولەهیێ کرنە، کو د ناڤ دە سێ پشکنینێن بەرفرەهـ ژی هەنە. د ئەنجامێ دە 95 چەکدار هاتنە گرتن، کو سێ ژ وان ژی سەرۆکێن وێ کۆمێ بوون. هەروەسا شەش چەتەیێن داعشێ ژی هاتنە کوشتن، کو دو سەرکردە ژی د ناڤ وان دە بوون، ژ بلی کو گەلەک چەک، تەقەمەنی و بەلگەنامە ژی هاتنە بندەستکرن.
وێ راگهاندنێ ئاماژە ژی دا، د ئێریشێن وێ رێکخستنێ دە 30 شەرڤانێن هه‌سه‌دێ هاتنە کوشتن و 12 شەرڤانێن دن ژی بریندار بوون، تەڤی شەش سڤیلان.
تەکەز ژی کر، ئەو خەتەریا کو ژ ئالیێ داعشێ ڤە هاتیە چێکرن هین ژی ب داوی نەبوویە و بەردەوام ژی گەفێن ناڤخوەیی و ناڤنەتەوەیی چێ دکە.
