وەزارەتا پێشمەرگە: ئەم نێزیکی قۆناغا داوی یا چاکسازیا یەکینەیێن 70 و 80 بوونە
وەزارەتا پێشمەرگە یا حکوومەتا هەرێما کوردستانێ راگهاند، ئەو د قۆناغێن داوی یێن پرۆسەیا چاکسازیێ دەنە و وان پێنگاڤەکە “دیرۆکی” ژ بۆ یەکخستنا هێزێن 70 و 80 ئاڤێتنە. د ڤێ چارچۆڤەیێ دە، بریار هاتیە دایین کو یەکینەیەکە ژماریاری یا سەربازی یا یەکگرتی وەرە دامەزراندن و هەموو هێزێن پێشمەرگە د بن سیوانا وەزارەتێ دە بێن کۆمکرن.
وەزارەتا پێشمەرگە دوهـ 22ێ ئیلۆنێ داخویانیەک بەلاڤ کر و تێ دە دا زانین، د جڤینەکە ب ئامادەبوونا وەزیرێ پێشمەرگە شۆرەش ئیسماعیل و نوونەرێن هێزێن هەڤپەیمانان دە، گاڤێن داوی یێن پرۆسەیا چاکسازیێ یا د ناڤ هێزێن 70 و 80 دە هاتنە گۆتووبێژکرن.
د جڤینێ دە بریار ل سەر دامەزراندنا یەکینەیەکە ژماریاری یا سەربازی یا یەکگرتی ژ بۆ هەموو هێزێن پێشمەرگەیێن کوردستانێ د بن سیوانا وەزارەتێ دە هاتیە دایین. وەزارەتێ ئەڤ پێنگاڤ وەکە نێزیکبوونا ژ قۆناغا داوی یا چاکسازیێ ب ناڤ کر.
هەروها هات دەستنیشانکرن، کار ژ بۆ دامەزراندنا فەرمانداریێن دەڤەرا یەک و دویەمین ب لەز ددۆمە و ئەڤ پێنگاڤ وەکە “گاڤەکە دیرۆکی بەر ب ئاڤاکرنا هێزەکە یەکگرتی یا کوردستانی” ڤە هات بناڤکرن.
