«سڤكاتیكرن ب شێخ سەعید ئێرشا ل دژی گەلێ کوردە»

پارلامەنتەرێ دەم پارتیێ سەرهات ئەرەن، بەرتەکەکە توند نیشانی حەقارەتێن کو د بەرنامەیەکە ل سەر کانالا یۆتوبێ دە ل شێخ سەعید هاتن کرن دا و راگهاند کو ئەڤ ئێرش نە تەنێ ل دژی کەسایەتیەکێ هەر وها ل دژی ب ملیۆنان کوردە.

پارلامەنتەرێ دەم پارتیێ سەرهات ئەرەن ئیرۆ ل سەر حەسابێ خوەیێ Xێ دەربارێ بەرنامەیا «شەرێ سار» پەیامەک بەلاڤ کر.

ئێریشەکە ل دژی ب ملیۆنان کوردە

ئەرەن د پەیاما خوە دە وها گۆت:

“گۆتنێن بچووکخستنێ یێن دەرحەقێ شێخ سەعید کو ل کانالا یۆتۆبێ یا ب ناڤێ «شەرێ سار» هاتنە بکارئانین، نە تەنێ ئێریشەکە ل دژی کەسایەتیەکێ هەر وها ئێریشەکە ل دژی ب میلیۆنان کوردانە.

رەشکرنا رێبەرێن دیرۆکی یێن ڤێ ئاخێ نە ئاشتیا جڤاکی لێ دژمناتیێ زێدە دکە.

شێخ سەعید، سەیید رزا و گەلەک نرخێن دن، روومەت و بیرا بەرخوەدانێ یا گەلێ کوردن.

گەلێ کورد دۆهـ ژی ل نرخێن خوە خوەدی دەرکەت ئیرۆ ژی دەردکەڤە.

دەرەوێن هەری درێژ و بەرفرەهێن دەولەتا ترک، ل سەر رەشکرن و ئینکارکرنا رێبەرێن کورد هاتنە ئاڤاکرن.

ئێدی دڤێ دەرەو، ئینکار و دژمناتیا 100 سالی ب داوی ببە.

د بەرنامەیا ناڤبۆری یا ل سەر کانالا یۆتۆبێ دە، دارڤەکرنا شێخ سەعید تێ ببیرئانین و گۆتنێن حەقارەتێ لێ تێن کرن.

ئەڤ یەک ل سەر مەدیایا جڤاکی راستی بەرتەکێن توند هات و گەلەک بکارهێنەران بانگی سازیێن پێوەندیدار کر کو ل هەمبەری ڤان گۆتنان ئەرکێ خوە ب جهـ بینن.