سەرۆکاتیا ھەرێما کوردستانێ پشتگریا دامەزراندنا دەولەتا فلستینێ دکە

سەرۆکاتیا ھەرێما کوردستانێ تەڤایا پشتەڤانی و پشتگریا خوە ژ بۆ مافێ گەلێ فلستینێ یێ دیارکرنا چارەنڤیسێ خوە و دامەزراندنا دەولەتا وێ د چارچۆڤەیا رەواتی و قانوونێن ناڤنەتەوەیی دە تەکەز دکە.

سەرۆکاتیا ھەرێما کوردستانێ ئیرۆ رۆژا سێشەمبی، 23ێ ئیلۆنا 2025ێ د راگھاندنەکێ دە گۆت، “ھەرێما کوردستانێ ب گرینگیەکا زێدە ل نیقاشێن ل کێلەکا جڤاتا گشتی یا نەتەوەیێن یەکگرتی و ناڤەندێن ناڤنەتەوەیی ل سەر مژارا فلستینێ دنێرە.”

سەرۆکاتیا ناڤبری ھەروەسا راگھاند، “ئەم ل ھەرێما کوردستانێ تەڤایا پشتەڤانی و پشتگریا خوە ژ بۆ مافێ گەلێ فلستینێ یێ دیارکرنا چارەنڤیسێ و دامەزراندنا دەولەتا وێ د چارچۆڤەیا رەواتی و قانوونێن ناڤنەتەوەیی دە تەکەز دکن.”

ھەر د وێ راگەھاندنێ دە ئاماژە ھاتیە دان، “ئەم، وەکی گەلەکی کو ژ بۆ ئازادی و مافێن خوە گەلەک قوربانی دایە، ب رێزداری ل تێکۆشین و قوربانیدانێن گەلێ فلستینێ ژ بۆ ئازادیێ دنێرن و ئەڤ گەلەک سالن کو مە ل ھەرێما کوردستانێ نوونەرتیا فلستینێ ھەیە.”

سەرۆکاتیا ھەرێما کوردستانێ تەکەز ل سەر ھەلوەستا ھەرێما کوردستانێ یا نەگوھەر ژی کر، کو شەر و کوشتن چ پرسگرێکەکێ چارەسەر ناکن.

سەرۆکاتیا ناڤبری تەکەز ژی کر کو، ژ بۆ کو ھەمی ئالی د ناڤ ئارامی، تەناھی و رەحەتیێ دە بژین، دڤێت شەر و چالاکیێن چەکداری راوەستن، پێکڤەژیان و ئاشتی بەرقەرار ببن و ل گۆری نرخێن مرۆڤی و قانوونی یێن ناڤنەتەوەیی مافێن رەوایێن گەلێن دەڤەرێ و ئەولەھی و ژیانا بروومەت و دادپەروەری ژ بۆ ھەمیان بێن دابینکرن و سەلماندن.

د چارچۆڤەیا جڤینا 80ێ یا جڤاتا گشتی یا نەتەوەیێن یەکگرتی یا ل سەر چارەسەریا دودەولەتیێ دە، کو دوھی رۆژا دوشەمبێ، 22ێ ئیلۆنا 2025ێ ھات لدارخستن، ب دەھان سەرۆک و سەرکردەیێن وەلاتان ئامادە بوون و چەند وەلاتان ژی دانپێدان ب دەولەتا فلستینێ کر.

ھەروەسا بریتانیا، کانادا، ئوستورالیا و پۆرتوگالێ ژی پێر یەکشەمبێ، 21ێ ئیلۆنا 2025ێ، ب ئاوایەکی فەرمی دانپێدان ب دەولەتا سەربخوە یا فلستینێ کر.