دارکا مازی ناڤەرۆکا نامەیا ئۆجالان یا ژ بۆ رۆژئاڤایێ کوردستانێ شاندی پارڤە دکە
عەڤدللا ئۆجالان، رێبەرێ پەکەکێ، د رۆژا 11/8/2025 دە، نامەیەک ژ ئیمرالیێ ژ بۆی رایەدارێن رێڤەبەریا خوەسەر یا رۆژئاڤایێ کوردستانێ شاندییە و تێ دە ب ئاوایەکی زەلال دژاتیا خوە ژ بۆی ئاڤاکرنا ستاتویەکە سەربخوە ل رۆژئاڤایێ کوردستانێ ئەشکەرە کریە و راگهاندیە، ” ئەرکا رۆژئاڤا نە دامەزراندنا دەولەتەکێ یە و نەژی راگەهاندنا فەدەراسیۆنێ یە. ئەرکا وە ئەوە کو ل سەر بنگەها ئازادییا ژنێ، جڤاکەکێ ئیکۆلۆژیک بخولقینن و پرۆژەیا نەتەوا دەمۆکراتیک ل تەڤاهیا سووریەیێ بەلاڤ بکن. ژ بەر ڤێ یەکێ ژی ئەساس ژ بۆی مە ئەڤە کو ئەم لگەل حکوومەتا ناڤەندی پەڤچوونان نەکن، بەلکو ئەم دێ ئاڤاهیا ڤێ حکوومەتێ بگوهرینن.”
نامەیا ئۆجالان وەهایە:
ژ بۆ گەلێ رۆژئاڤا، ژ بۆ ھەڤالێن د رێیا ئازادیێ دە.
ژ بیر نەکن: رزگاریا گەلان نە د قەشەنگییا دەرەوین یا دەولەتان دەیە، لێ د راستیا نەتەوەیا دەمۆکراتیک دەیە. د سەرانسەرێ دیرۆکێ دە، پادیشاھ، سولتان و دەولەتێن نەتەوەیی ھاتنە و چوونە.
ھەموویان ل دوو خوە رە کاڤل و ئێش ھشتنە. لێ خوەرێخستنکرنا گەل، رحێ بەرخوەدانا ژنان و پیرۆزیا سرووشتێ مایە.
ڤەبژارکێن کو ئیرۆ ل پێشیا رۆژئاڤانە زەلالن: یان د خەونەکا تەنگا نەتەوەپەرەستی دە ئاسێ بمینن،
یان ژی ب ھەڤکاریا گەلێ سووریێ جڤاتەک دەمۆکراتیک دێ ئاڤا بکن. ھەر لێگەرینا فەدەراسیۆن یان نەتەوە دەولەتبوونێ دێ گەلێ مە ڤەگوھەرینە پێلیستۆکەکا ھێزێن ئەمپەریال. نرخاندنەک ل دیرۆکێ بەسە کو مرۆڤ ڤێ یەکێ ببینە.
ئەز ژ وە رە دبێژم: تشتێ کو وەکی تەسلیمبوون خویا دکە، د راستیێ دە ھلپەرینەک مەزنە. ئەنتەگراسیۆنا ھەڤگرتی ب حکوومەتا ناڤەندی(سوورییە) رە دێ گەلێ مە نەفەتسینە؛ بەرەڤاژی ڤێ، ئەو دێ ببە جیھەک نەفەس ستاندنێ. ئەڤ نە پاشکەتنە، مەشا بەر ب پێش ڤەیە.
ژ بەر کو فکرا نەتەوەیەک دەمۆکراتیک ژ سینۆرێن دەولەتا نەتەوەیی دەرباس دبە؛ ئەو یەکیتیا براتیا گەلان ئەساس دگرە.
بێیی ئازادیا ژنان ئازادی نابە. ھەر سیاسەتەک کو ئەکۆلۆژیێ پاشگوھ بکە دێ مرۆڤان بکشینە ناڤ زەڤیێن مرنێ.
ژ بەر ڤێ یەکێ ئەرکا رۆژئاڤا نە ئاڤاکرنا دەولەتەکێیە و نە ژی راگەهاندنا فەدەراسیۆنێیە. میسیۆنا وە ئەوە کو ھوون جڤاتەک ئەکۆلۆژیک ل سەر بنگەھا ئازادیا ژنان بافرینن و پرۆژەیا نەتەوەیا دەمۆکراتیک ل سەرانسەرێ سووریەیێ بەلاڤ بکن. ژ بۆ ڤێ یەکێ، چارەسەری پەڤچوونا لگەل حکوومەتا ناڤەندی نینە، گوھەرتنا وێیە.
دژوار بن، لێ دژوارییێ جھێ خەلەت بکار نەینن. بەرخوەدانێ نە ل دژی گەل، ل دژی پاشڤەرووتی و ئەمپەریالیزمێ رێخستن بکن. ھەموو ھێزا خوە نە ژ بۆ ئاڤاکرنا دەولەتا خوە، لێ ژ بۆ پێشخستنا ژیانا ھەڤبەشا گەلان بشوغلینن.
ئەز جارەکە دن ھشیاریێ ددم وە: پێشەرۆژا گەلێ مە ژ بۆ نەتەوەپەرەستیا تەنگ فەدا نەکن. ئەنتەگراسیۆن نە وندابوونە؛ ئەو پێشڤەجوونە ژ بۆ بێداویبوونا گەلان.
